
சியா விதைகள் உடல் எடையை குறைக்க உதவுமா?
உடல் எடையை குறைக்கவும், செரிமான ஆரோக்கியத்தை மேம்படுத்தவும் பலர் காலையில் வெறும் வயிற்றில் சியா விதைகளை உட்கொள்கின்றனர்.
நார்ச்சத்து, ஒமேகா-3 கொழுப்பு அமிலங்கள், புரதம் மற்றும் ஆன்டி-ஆக்ஸிடன்ட்கள் நிறைந்துள்ள சியா விதைகள், சரியான முறையில் எடுத்துக்கொண்டால் உடலுக்கு பல்வேறு நன்மைகளை வழங்குகின்றன.
சியா விதைகளை தண்ணீரில் 6 முதல் 8 மணி நேரம் அல்லது இரவு முழுவதும் ஊறவைத்து காலையில் உட்கொள்வது செரிமானத்தை சீராக்கவும், நீண்ட நேரம் பசி எடுக்காமல் இருக்கவும் உதவுகிறது.

இதனால் அதிக உணவு உட்கொள்ளும் பழக்கம் குறைந்து, உடல் எடையை கட்டுப்படுத்தவும் உதவுகிறது. மேலும், ரத்த சர்க்கரை அளவை சீராக வைத்திருக்கவும், இதய ஆரோக்கியத்தை மேம்படுத்தவும் சியா விதைகள் பயனுள்ளதாக கருதப்படுகின்றன.
ஆனால், பலர் செய்யும் மிகப்பெரிய தவறு அளவுக்கு அதிகமாக சியா விதைகளை சாப்பிடுவதுதான்.
அதிக நார்ச்சத்து இருப்பதால் தேவைக்கு அதிகமாக எடுத்துக்கொண்டால் வயிற்று உப்புசம், வாயுத் தொல்லை, செரிமானக் கோளாறு மற்றும் வயிற்று அசௌகரியம் போன்ற பிரச்சனைகள் ஏற்படலாம்.
அதேபோல், சியா விதைகள் உடலில் தண்ணீரை அதிகமாக உறிஞ்சும் தன்மை கொண்டதால், அவற்றை உட்கொள்ளும் நாட்களில் போதுமான அளவு தண்ணீர் குடிப்பதும் மிகவும் அவசியம்.

ஆரோக்கிய நிபுணர்களின் பரிந்துரைப்படி, ஒரு நாளுக்கு 1 முதல் 2 டேபிள்ஸ்பூன் (15–30 கிராம்) சியா விதைகள் போதுமானதாகும்.
ஆரம்பத்தில் 1 டீஸ்பூன் அளவில் தொடங்கி, உடலுக்கு ஏற்றதாக இருந்தால் மட்டுமே அளவை மெதுவாக அதிகரிக்க வேண்டும். சியா விதைகளை எலுமிச்சை சாறு, தயிர், பால், ஸ்மூத்தி அல்லது பழங்களுடன் சேர்த்தும் உட்கொள்ளலாம்.
சியா விதைகள் ஆரோக்கியத்திற்கு நல்லதுதான். ஆனால், சரியான அளவு மற்றும் சரியான முறையில் எடுத்துக்கொண்டால் மட்டுமே அதன் முழு நன்மைகளையும் பெற முடியும்.
எனவே, அதிகம் சாப்பிட்டால் அதிக பலன் கிடைக்கும் என்ற எண்ணத்தை தவிர்த்து, அளவோடு பயன்படுத்துவது மிகவும் முக்கியம்.




