விமர்சனத்துக்கு உணர்ச்சியுடன் பதிலளித்த சூரி

தமிழ் சினிமாவின் பிரபல நடிகர் சூரி சமீபத்தில் தன்னைக் குறித்த விமர்சனத்துக்கு மனதைத் தொட்ட வகையில் பதிலளித்துள்ளார்.

தீபாவளி பண்டிகையை குடும்பத்துடன் கொண்டாடிய சூரி, அதனைப் பதிவு செய்து எக்ஸ் தளத்தில் (முன்னாள் ட்விட்டர்) பகிர்ந்திருந்தார். அந்த பதிவுக்கு ரசிகர்கள் பெருமளவில் பாராட்டுகள் தெரிவித்திருந்தாலும், சிலர் அவரை விமர்சிக்க முயன்றனர்.

அவர்களில் ஒருவர், “திண்ணையில் கிடந்தவனுக்கு வந்த வாழ்க்கை” என்று தரக்குறைவான கருத்து தெரிவித்திருந்தார். அதற்கு சூரி அமைதியிழக்காமல், உணர்ச்சியுடன் பதில் அளித்தார்.

“திண்ணையில் இல்ல நண்பா, பல நாட்களும் இரவுகளும் ரோட்டில்தான் இருந்தவன் நான். அந்த பாதைகள்தான் எனக்கு வாழ்க்கையின் உண்மையையும் மதிப்பையும் கற்றுத் தந்தது. நீயும் உன் வளர்ச்சியில் நம்பிக்கை வைத்தால், வெற்றி நிச்சயம் உன்னைத் தேடி வரும்,” என்று சூரி பதிலளித்தார்.

சூரியின் இந்த முதிர்ச்சியான பதில் பலரின் மனதையும் தொட்டுள்ளது. சமூக வலைதளங்களில் அந்தப் பதிவுக்கு ஆயிரக்கணக்கான லைக்ஸ்களும் பாராட்டுகளும் குவிந்து வருகின்றன.

ஒரு நேரத்தில் சிறு கதாபாத்திரங்களில் நடித்து முன்னேறிய சூரி, இன்று தமிழ் திரையுலகில் முக்கியமான ஹீரோவாக திகழ்கிறார். வெற்றிமாறன் இயக்கிய விடுதலை படத்தில் நடித்ததன் மூலம் ரசிகர்களிடம் வித்தியாசமான இடத்தைப் பெற்றுள்ளார். தற்போது அவர் பல முக்கியமான படங்களில் முன்னணி கதாபாத்திரங்களில் நடித்து வருகிறார்.

சூரியின் இந்த பதில், “வெற்றி அடைந்தவர்கள் தங்கள் கடந்தகாலத்தை மறக்காமல் வாழ்வதற்கான சிறந்த உதாரணம்” என ரசிகர்கள் பாராட்டுகின்றனர்.