விஜயுடன் நடந்த ஒரு சம்பவம் – ரோஜா எடுத்த முக்கிய முடிவு

தமிழ் மற்றும் தென்னிந்திய சினிமாவில் முன்னணி நடிகையாக வலம் வந்தவர் நடிகை ரோஜா. 1992 ஆம் ஆண்டு இயக்குனர் ஆர்.கே.செல்வமணியின் செம்பருத்தி திரைப்படம் மூலம் திரையுலகில் அறிமுகமான அவர், சூரியன், அதிரடிப் படை, ராஜமுத்திரை, ராசைய்யா, உன்னிடத்தில் என்னை கொடுத்தேன் போன்ற பல வெற்றி படங்களில் நடித்தார்.

தமிழ் மட்டும் அல்லாமல், தெலுங்கு, மலையாளம், கன்னடம் என தென்னிந்திய முழுவதும் ரசிகர்களை கவர்ந்தவர். பின்னர் 2015-ம் ஆண்டு வெளிவந்த என் வழி தனி வழி படத்திற்குப் பிறகு திரை உலகிலிருந்து விலகி அரசியலுக்கு மாறினார். தற்போது அவர் ஆந்திர மாநிலத்தில் நகரி தொகுதியின் எம்.எல்.ஏவாக பணியாற்றி வருகிறார்.

சமீபத்தில் அளித்த ஒரு பேட்டியில், தனது நடிப்பு வாழ்க்கையில் நடந்த ஒரு சம்பவம் தான் தன்னை “அம்மா” கதாபாத்திரங்களில் நடிக்காமல் விலக வைத்தது என்று ரோஜா பகிர்ந்துகொண்டார்.

ரோஜா கூறியதாவது: “ஒரு காலத்தில் விஜயுடன் சேர்ந்து ஒரு பாடலில் நடனம் ஆடியிருந்தேன். அது நெஞ்சினிலே திரைப்படத்தில் ‘தங்க நிறத்துக்கு தான் தமிழ்நாட்ட எழுதி தரட்டுமா’ பாடல். அப்பொழுது விஜய் மிகவும் அமைதியானவர் — செட்டில் வந்து நடனம் ஆடி, எதுவும் பேசாமல் சென்றுவிடுவார்.

பின்னர் பல ஆண்டுகள் கழித்து, நான் ‘காவலன்’ படத்தில் அசினின் அம்மாவாக நடித்தேன். அதை பார்த்த விஜய் மிகவும் ஆச்சரியப்பட்டார். ‘ரோஜா மேடம் அம்மா கதாபாத்திரம் நடிப்பது எப்படி சாத்தியம்? நான் அவருடன் டான்ஸ் ஆடினேன் அல்லவா!’ என்று விஜய் சிரித்தபடி சொன்னார்.

அந்த வார்த்தை எனக்கு நெருக்கமாக பட்டது. ரசிகர்களுக்கும் அதே உணர்வு வரும் என்று நினைத்து, அப்போதே நான் அம்மா கதாபாத்திரங்களில் இருந்து விலக முடிவு செய்தேன். அதன் பிறகு நான் சின்னத்திரை நிகழ்ச்சிகளில் மட்டும் தோன்றுகிறேன்,” என்று ரோஜா கூறியுள்ளார்.