மோந்தா புயல் தாக்கம் – பல மாகாணங்களுக்கு எச்சரிக்கை

இலங்கை வானிலைத் திணைக்களம் இன்று (27) காலை 8.30 மணிக்கு வெளியிட்ட அறிக்கையின்படி, பல மாகாணங்களுக்கு பலத்த காற்று வீசும் அபாயம் காரணமாக ‘ஆம்பர்’ வானிலை எச்சரிக்கை விடுக்கப்பட்டுள்ளது. இந்த எச்சரிக்கை நாளை (28) காலை 8.30 மணி வரை, அதாவது அடுத்த 24 மணி நேரத்திற்கு அமலில் இருக்கும்.

மேற்கு, சபரகமுவ, மத்திய, தெற்கு, வடக்கு, வட மத்திய, வட மேற்கு மாகாணங்களுடன், திருகோணமலை மற்றும் மட்டக்களப்பு மாவட்டங்களிலும் பலத்த காற்று வீசும் வாய்ப்பு இருப்பதாக வானிலைத் திணைக்களம் தெரிவித்துள்ளது. சில நேரங்களில் மணிக்கு 50 முதல் 60 கிலோமீட்டர் வரை வேகத்தில் காற்று வீசக்கூடும் என எச்சரிக்கப்பட்டுள்ளது.

இது, வங்காள விரிகுடாவில் இலங்கையின் வடகிழக்குப் பகுதியில் உருவாகியுள்ள “மோந்தா” என்ற புயல் தாக்கத்தின் காரணமாக உருவாகிய வானிலை மாற்றமாகும்.

இதனால், பொதுமக்கள் மற்றும் கடலோர பகுதிகளில் வசிக்கும் மக்கள் தங்கள் வீடுகள் மற்றும் பொருட்களுக்கு ஏற்படும் சேதங்களைத் தவிர்க்க தேவையான முன்னெச்சரிக்கை நடவடிக்கைகளை எடுக்குமாறு வானிலைத் திணைக்களம் கேட்டுக்கொண்டுள்ளது.