புதிய வான்படை அதிகாரிகளுக்கு ஜனாதிபதியின் ஊக்க உரை

இலங்கை வான்படைக்கு அதிபரின் சிறப்புக் கொடி வழங்கும் விழா மற்றும் கேடட் அதிகாரிகள் பதவி ஏற்பு நிகழ்வில் அதிபர் அனுரா குமார திஸாநாயக்க கலந்து கொண்டு புதிய அதிகாரிகளுக்கு முக்கியமான செய்தியை பகிர்ந்துள்ளார்.

அதிபர் உரையாற்றியபோது, “இன்று நீங்கள் இலங்கையின் மிக மதிப்புமிக்க, சிறப்பான, தொழில்முறை அமைப்புகளில் ஒன்றான இலங்கை வான்படையில் இணைகிறீர்கள். இந்த வரலாற்றையும் கௌரவத்தையும் காக்கும் பொறுப்பு உங்கள்மீது உள்ளது. ஒரே ஒரு அதிகாரியின் தவறான நடத்தை கூட முழு வான்படையின் கண்ணியத்தைக் குலைக்கும். மேலும், நாட்டை பாதுகாக்கும் கடமையும் உங்கள்மீது உள்ளது, அதை நீங்கள் சிறப்பாக நிறைவேற்றுவீர்கள் என்பதில் எனக்கு முழு நம்பிக்கை உள்ளது” என்று கூறினார்.

மேலும், கடல் எல்லைகளை பாதுகாப்பது, சட்டவிரோத குடியேற்றங்கள், பொருட்கள், போதைப்பொருள் மற்றும் ஆயுத கடத்தல்களை தடுக்குதல் போன்ற முக்கிய பணிகள் வான்படைக்கு வழங்கப்பட்டிருப்பதாகவும் அதிபர் வலியுறுத்தினார். “அரசியல் மற்றும் அரச அமைப்புகளுக்குள் சிலர் போதைப்பொருள் வியாபாரத்தில் ஈடுபட்டிருப்பதை நாங்கள் அறிந்திருக்கிறோம். இது கிராமப்புறங்களுக்கும் பரவியுள்ளது. எனவே, கடல்சார் கண்காணிப்பு மிக அவசியமானது” என்றார்.

அவர் மேலும் கூறுகையில், “அரசு அமைப்புகளில் பலவற்றில் தொழில்முறைத் தன்மை குறைந்துவிட்டாலும், இலங்கை வான்படை இன்னும் பெருமையுடனும் ஒழுங்குடனும் அதன் தொழில்முறையை காத்து வருகின்றது” என்று தெரிவித்தார்.

தன் உரையை முடித்த அதிபர் திஸாநாயக்க, “நீங்கள் உங்களுடைய கடமைகளை நேர்மையுடனும் உழைப்புடனும் நிறைவேற்றுவீர்கள் என்று நான் நம்புகிறேன்” என்று புதிய அதிகாரிகளுக்கு வாழ்த்துகளைத் தெரிவித்தார்.