“ரசிகர்களுக்கே போட்டி” – சரித் அசலன்க

ஆசியக் கோப்பை 2025 கிரிக்கெட் தொடரின் தொடக்கப் போட்டியில் அபுதாபியில் பங்களாதேசுக்கு எதிராக களமிறங்க உள்ள இலங்கை அணியின் தலைவர் சரித் அசலங்கா, ரசிகர்களிடையே உருவாகும் போட்டித் தன்மையை சிறிதளவு குறைத்து வெளிப்படுத்தியுள்ளார்.

இரு அணிகளுக்கிடையேயான போட்டிகள் கடந்த காலங்களில் பெரும் எதிர்பார்ப்புகளையும் சில சர்ச்சை தருணங்களையும் உருவாக்கியுள்ளன. 2018ஆம் ஆண்டு நிதாஸ் கோப்பை போட்டியில் இடம்பெற்ற “நாகின் டான்ஸ்” சம்பவத்திலிருந்து, 2023 உலகக்கோப்பை “டைம்-அவுட் டெர்பி” வரை பல்வேறு சூடான நிகழ்வுகள் இந்தச் சந்திப்புக்கு வித்தாகியுள்ளன.

ஆனால், “இது ரசிகர்களுக்கான போட்டி. எங்களுக்கு வீரர்களாக, இது நல்ல சவாலான ஆட்டம் மட்டுமே. பங்களாதேசுக்கும் மற்ற அணிகளுக்கும் எதிராக நாங்கள் நல்ல ஆட்டத்தை வழங்கவே விரும்புகிறோம்,” என அசலங்கா பத்திரிகையாளர் சந்திப்பில் தெரிவித்துள்ளார்.

அவரது கூற்றுப்படி, ரசிகர்களின் ஆர்வம் சில நேரங்களில் ஊக்கமளித்தாலும், வீரர்கள் கவனம் செலுத்த வேண்டியது தங்கள் அடிப்படை நுட்பங்களிலும் திட்டங்களிலும் தான். “சிறிது ஊக்கம் கிடைக்கும், ஆனால் எங்களுக்கு இது ஒரு சாதாரண போட்டிதான். எங்கள் திட்டங்களை சரியாக நிறைவேற்ற வேண்டும் என்பதே முக்கியம்,” என அவர் வலியுறுத்தினார்.

சமீபத்தில் இலங்கையில் நடைபெற்ற இருதரப்பு தொடரில் பங்களாதேசிடம் தோல்வியடைந்திருந்தாலும், அதில் இருந்து பல பாடங்களை கற்றதாக அசலங்கா குறிப்பிட்டார்.

“அவர்கள் தற்போது மிகச்சிறந்த நிலையில் உள்ளனர். நாங்கள் தோற்றாலும் நல்ல கிரிக்கெட்டையே விளையாடினோம். எங்கள் அடிப்படைகளில் நிலைத்து நன்றாக செயல்படுவதே எங்கள் இலக்கு,” என்றார்.

அபுதாபி மைதான நிலைமைகள் போட்டியை பாதிக்கக்கூடும் என்றும், குறிப்பாக பேட்டிங்கிற்கு சாதகமாக இருக்கும் என்றும் அவர் கூறினார்.

“ஐக்கிய அரபு எமிரேட்ஸ் மைதானங்களில், அபுதாபிதான் பேட்ஸ்மேன்களுக்கு சிறந்தது. பந்தின் பிரகாசம் குறைந்த பின் பேட்டிங் மேலும் எளிதாகும். அவுட்ஃபீல்டும் அருமையாக இருக்கும்,” என்றார்.

மேலும், காயம் காரணமாக கடந்த தொடரில் இல்லாதிருந்த நட்சத்திர ஆல்-ரவுண்டர் வனிந்து ஹசரங்கா அணியில் திரும்புவது பெரும் பலமாக இருக்கும் என அவர் தெரிவித்தார்.

“அவரை மீண்டும் அணியில் காணும் போது அது மிகப் பெரிய நம்பிக்கையைத் தருகிறது. வெள்ளைப் பந்துப் போட்டிகளில் அவர் எங்கள் சூப்பர் ஸ்டார்களில் ஒருவராக உள்ளார்,” என பாராட்டினார்.

பங்களாதேசின் சமீபத்திய வெற்றிகள், இலங்கையின் துவக்க வெற்றி கனவு, மற்றும் ஹசரங்காவின் திரும்புதல் ஆகியவற்றால் ரசிகர்களுக்கான “நாகின் டெர்பி” மீண்டும் சூடுபிடிக்கும் நிலையில், அசலங்கா அதை “ஒரு சாதாரண போட்டி” என்று கூறினாலும், அபுதாபியில் நடைபெறும் இந்தப் போட்டி இரண்டு புள்ளிகளுக்குமேல் அர்த்தமுடையதாக இருக்கும் என்பது உறுதி.