செம்மணி அகழ்வுப் பணி மழையால் நிறுத்தம்

செம்மணி பொது கல்லறை பகுதியில் நடைபெற்று வந்த அகழ்வுப் பணிகளின் மூன்றாம் கட்டம், மழைநீர் தேங்கியுள்ளதால் தற்காலிகமாக ஒத்திவைக்கப்பட்டுள்ளது.

இதுவரை நடைபெற்ற முதல் இரண்டு கட்ட அகழ்வுப் பணிகளில், மொத்தம் 240 மனித எலும்புக்கூடுகள் கண்டறியப்பட்டுள்ளன. இதில் 239 எலும்புக்கூடுகள் அகழ்ந்து எடுக்கப்பட்டதாக அதிகாரிகள் தெரிவித்துள்ளனர்.

மூன்றாம் கட்ட அகழ்வுப் பணிக்கான நிதி ஏற்கனவே ஒதுக்கப்பட்டிருந்த நிலையில், யாழ்ப்பாண நீதிவான் எஸ். லெனின் குமார் தலைமையில் நீதிமருத்துவர் மற்றும் வழக்கறிஞர்கள் உள்ளிட்ட குழுவினர் செம்மணி அகழ்வுப் பகுதியை நேரில் பார்வையிட்டனர்.

அவர்களின் ஆய்வின் போது, மழைநீர் கல்லறை பகுதியின் உள்ளே தேங்கி இருந்தது கண்டறியப்பட்டது. இதன் காரணமாக, தற்போதைய நிலைமையில் அகழ்வுப் பணியை தொடங்க முடியாத சூழல் ஏற்பட்டுள்ளது.

இதனைத் தொடர்ந்து, 2026 ஜனவரி 19ஆம் திகதி அந்தக் குழு மீண்டும் செம்மணி கல்லறைத் தளத்துக்கு சென்று நிலைமையை மீளாய்வு செய்து, மூன்றாம் கட்ட அகழ்வுப் பணியை தொடங்குவது குறித்து முடிவு எடுக்கப்படும் என்று அதிகாரிகள் தெரிவித்துள்ளனர்.