கரையை கடக்கும் மொந்தா புயல் - அதிக மழைக்கு வாய்ப்பு

தென்கிழக்கு வங்கக் கடலில் கடந்த சில நாட்களாக உருவாகி வலுவடைந்த ‘மொந்தா’ புயல், இன்று (29) அதிகாலை ஆந்திரா மாநிலம் காக்கிநாடா அருகே கரையை கடந்தது.

புயல் கரையை கடக்கும் வேளையில் மணிக்கு 110 கிலோமீட்டர் வரை வேகத்தில் பலத்த காற்று வீசியது. இதனால் ஆந்திராவின் மசூலிபட்டினம், கிருஷ்ணா மாவட்டம், அல்லூரி மாவட்டம் உள்ளிட்ட பல கடலோர பகுதிகளில் மின்னல், இடி, கனமழை ஆகியவை பெய்தன.

புயலின் தாக்கத்தில் பல இடங்களில் மரங்கள் முறிந்து விழுந்தன, மின் கம்பங்கள் சாய்ந்தன. அல்லூரி மாவட்டத்தில் மரம் விழுந்ததில் பெண் ஒருவர் உயிரிழந்ததாகவும், இருவர் காயமடைந்ததாகவும் தகவல்கள் தெரிவிக்கின்றன.

மொந்தா புயல் கரையை கடந்ததையடுத்து, தற்போது அது தளர்ந்த ஆழ்ந்த தாழ்வுச் சுழற்சியாக மாறி உள்ளகப் பகுதிகளுக்கு நகர்ந்து கொண்டிருக்கிறது. இதன் காரணமாக தமிழ்நாடு முழுவதும் அடுத்த 6 நாட்களுக்கு மிதமான மழை பெய்யும் வாய்ப்பு இருப்பதாக வானிலை மையம் தெரிவித்துள்ளது.

சென்னையில் இன்று மேகமூட்டம் சூழ்ந்த வானிலை காணப்படும் எனவும், ஓரிரு இடங்களில் மிதமான மழை பெய்யலாம் எனவும் வானிலை ஆய்வு மையம் கணித்துள்ளது.

மேலும், தமிழ்நாடு மற்றும் புதுச்சேரி கடலோர பகுதிகள், குறிப்பாக கடற்கரை மாவட்டங்கள் மற்றும் குமரிக் கடல் பகுதிகளில் மணிக்கு 45 முதல் 55 கிலோமீட்டர் வேகத்தில் காற்று வீசக்கூடும் என்றும், இடையிடையே 65 கிலோமீட்டர் வரை பலத்த காற்று வீசும் வாய்ப்பும் உள்ளதாகவும் வானிலை மையம் எச்சரித்துள்ளது.

மீனவர்கள் இன்றும் கடல் பயணத்திற்கு செல்ல வேண்டாம் என எச்சரிக்கப்பட்டுள்ளது.