தினசரி 4000 அடிகள் நடப்பது மூளைக்கு பலனளிக்குமா?

இன்றைய பரபரப்பான வாழ்க்கையில் உடற்பயிற்சி செய்ய நேரமில்லை என்றே பலர் கூறுகிறார்கள். ஆனால், தினசரி வெறும் 4000 அடிகள் நடந்தாலே கூட நம் உடலின் மட்டுமல்ல, நம் மூளையின் செயல்பாடுகளிலும் குறிப்பிடத்தக்க மாற்றங்களை காணலாம் என்பதையே சமீபத்திய ஆய்வுகள் உறுதிப்படுத்துகின்றன.

நடை என்பது சாதாரணம் போல் தோன்றினாலும், அது நம் நரம்பியல் அமைப்பை ஊக்குவித்து, மனநிலையை சீராக்கும் சக்தி வாய்ந்த ஒரு இயற்கை மருந்தாக கருதப்படுகிறது.

தினசரி 4000 அடிகள் நடப்பது சரியா? தவறா?

மன அழுத்தம், கவலை, நினைவு குறைபாடு, உளைச்சல் போன்ற பிரச்சனைகள் இன்று ஒவ்வொரு வயதிலும் உள்ளவர்களை தாக்கிக்கொண்டிருக்கின்றன. இவற்றைக் கட்டுப்படுத்தும் ஒரு எளிய வழி தினசரி நடைப்பயிற்சியாக இருக்கலாம்.

குறிப்பாக 4000 அடிகள், சுமார் 3 முதல் 3.5 கிலோமீட்டர் வரை நடப்பது, மிகக் கடினம் அல்லாத ஒரு இலக்காகக் கருதப்படுகிறது.

நடப்பதனால், மூளைக்கு தேவையான ஆக்சிஜன் மற்றும் ரத்த ஓட்டம் அதிகரிக்கிறது. இதன் மூலம் மூளையின் நினைவாற்றல், மனக்கவனம் மற்றும் சிந்தனை திறன் மேம்படுகிறது. மேலும், நடைப்பயிற்சியின் போது "எண்டார்ஃபின்" என்ற feel-good ஹார்மோன் சுரக்கிறது. இது மனச்சோர்வை குறைக்கும்.

மூளையின் ஹிப்போகேம்பஸ் பகுதி (நினைவாற்றலுக்கு பொறுப்பான பகுதி) நடைப்பயிற்சியின் மூலம் சுறுசுறுப்படைவதாகவும், இது முதுமையில் ஏற்படக்கூடிய மூளை நோய்கள் (Alzheimer's, Dementia போன்றவை) அபாயத்தை குறைப்பதாகவும் மருத்துவக் கருத்துகள் கூறுகின்றன.

ஒரு காலத்தில், நாள் ஒன்றுக்கு 10,000 அடிகள் நடக்கவேண்டும் என்பதே பொதுவான நம்பிக்கை. ஆனால் தற்போது ஆராய்ச்சியாளர்கள் கூறுவதாவது, 4000–5000 அடிகள் நடப்பதும் ஆரம்ப நிலை பயிற்சிக்கேற்ப மிகச் சிறந்ததாகும். குறிப்பாக உடனடியாக அதிக பயிற்சி செய்ய முடியாதவர்கள், வயதானவர்கள், அல்லது வேலைப் பரபரப்புடன் இருப்பவர்கள் இந்த அளவில் தொடங்கலாம்.

தினமும் நடைப்பயிற்சி மேற்கொள்வது நினைவு பலமாகவும், மனநிலை உற்சாகமாகவும் வாழ உதவும். இது மாத்திரமல்லாமல், ஒட்டுமொத்த நரம்பியல் ஆரோக்கியத்தையும் தூண்டுகிறது. இயற்கையில் நடைப்பயிற்சி மேற்கொள்வது கூடுதல் நன்மைகளை தரும். மரம் நிறைந்த வழிகளில் நடப்பது மனதையும், மூளையையும் சீராக்குகிறது.

இதனால், தினமும் 4000 அடிகள் நடந்தாலே மூளையைப் பாதுகாப்பதோடு, அதனை மேலும் கூர்மையாக்கும் திறனும் உண்டு. இது ஓர் எளிய செயலாக இருந்தாலும், அதன் தாக்கம் ஆழமானது. தினசரி நடை, நம்மை ஆரோக்கியமானவர்களாக மட்டுமல்லாமல், புத்திசாலித்தனமானவர்களாகவும் உருவாக்கும் என்பதை உணர்ந்துகொள்வது அவசியம்.