டிரம்ப் சீன இறக்குமதிக்கு 100% வரி அறிவிப்பு

அமெரிக்க அதிபர் டொனால்ட் டிரம்ப், வரும் மாதம் முதல் சீனாவிலிருந்து வரும் அனைத்து இறக்குமதி பொருட்களுக்கும் கூடுதலாக 100% வரி விதிக்கப்போவதாக அறிவித்துள்ளார்.

சமூக ஊடகத்தில் வெளியிட்ட பதிவில், டிரம்ப் மேலும் முக்கியமான மென்பொருட்களின் ஏற்றுமதியிலும் கட்டுப்பாடுகள் விதிக்கப்படும் என்று தெரிவித்துள்ளார்.

இதற்கு முன், சீனா தன்னுடைய அரிதான கனிமப் பொருட்களின் ஏற்றுமதிக்கு புதிய கட்டுப்பாடுகளை விதித்ததை அவர் கடுமையாக விமர்சித்து, “சீனா உலகை கைதியாக வைத்திருக்க முயல்கிறது” என்று குற்றம்சாட்டினார்.

அவர் சீன அதிபர் ஸி ஜின்பிங்குடன் நடைபெற இருந்த சந்திப்பை ரத்து செய்யும் முடிவை எடுத்ததாக முதலில் குறிப்பிட்டாலும் பின்னர் “நான் அங்கு இருப்பேன், ஆனால் சந்திப்பு நடக்குமா என்பதை உறுதியாக சொல்ல முடியாது” எனத் தெரிவித்தார். இதன் பின்னர் அமெரிக்க பங்கு சந்தை கடுமையாக வீழ்ச்சி அடைந்தது. குறிப்பாக, S&P 500 குறியீடு 2.7% வீழ்ச்சியடைந்தது – இது ஏப்ரல் மாதத்திற்குப் பிறகு மிகப் பெரிய வீழ்ச்சியாகும்.

சீனா உலகளவில் அரிதான கனிமங்கள் (rare earths) மற்றும் பல முக்கிய உற்பத்திப் பொருட்களில் முன்னணியில் உள்ளது. இதேபோல், டிரம்ப் முன்பு வரி உயர்த்தியபோது பல அமெரிக்க நிறுவனங்கள் உற்பத்தியை நிறுத்த வேண்டிய நிலைக்கு தள்ளப்பட்டன. குறிப்பாக, Ford நிறுவனம் தற்காலிகமாக உற்பத்தியை நிறுத்தியிருந்தது.

சீனாவும் இதற்கு பதிலளித்து, அமெரிக்க தொழில்நுட்ப நிறுவனம் Qualcomm மீது போட்டி ஒழுங்குமுறை விசாரணையைத் தொடங்கியுள்ளது. அதோடு, அமெரிக்காவுடன் தொடர்புடைய கப்பல்களுக்கு புதிய துறைமுகக் கட்டணங்களையும் அறிமுகப்படுத்தியுள்ளது. இதனால், அமெரிக்க வணிக வட்டாரங்களில் பெரும் அச்சம் நிலவுகிறது.

டிரம்ப் தனது பதிவில் “சீனாவில் சில விசித்திரமான விஷயங்கள் நடக்கின்றன! அவர்கள் மிகவும் பகைத்த மனநிலையில் மாறி வருகின்றனர்” என்று கூறியுள்ளார். மே மாதத்தில் இரு நாடுகளும் வணிக ஒப்பந்தம் ஒன்றை எட்டியிருந்தாலும், தற்போதைய சூழலில் மீண்டும் பதற்றம் அதிகரித்துள்ளது.

அமெரிக்க மற்றும் சீன அதிகாரிகள் சமீபத்தில் TikTok, வேளாண் பொருட்கள் மற்றும் செமிகண்டக்டர் தொழில்நுட்பங்கள் குறித்து பல்வேறு பேச்சுவார்த்தைகள் நடத்தியிருந்தனர். ஆனால் தற்போது டிரம்ப் அறிவித்த புதிய வரி திட்டம், இரு நாடுகளுக்கிடையேயான உறவை மீண்டும் சிக்கலாக்கியுள்ளது.

ப்ரூகிங்ஸ் இன்ஸ்டிடியூஷனின் சீனா நிபுணர் ஜொனாதன் சின் கூறுகையில், “சீனா தற்போதைய பேச்சுவார்த்தைகளை தன் பக்கம் திருப்பிக்கொள்ள முயற்சி செய்கிறது” என்று தெரிவித்தார். அதே நேரத்தில், அமெரிக்காவிடம் இருந்து வரும் எதிர்வினையை சீனா பெரிதாக அஞ்சவில்லை என்றும் அவர் கூறினார்.

சீனா இதுவரை அரிதான கனிம உற்பத்தியில் உலகில் முன்னணியில் இருப்பதைக் கருத்தில் கொண்டு, இந்த முடிவு அமெரிக்க பாதுகாப்புத் துறைக்கே பெரும் அழுத்தமாக மாறும் என்று சர்வதேச ஆய்வாளர்கள் எச்சரித்துள்ளனர்.

வாஷிங்டனில் அமைந்துள்ள Center for Strategic and International Studies நிறுவனத்தின் இயக்குநர் கிரேஸ்லின் பஸ்கரன் கூறுகையில், “அமெரிக்க பாதுகாப்பு துறையை குறிவைத்து சீனா எடுத்துள்ள இந்த நடவடிக்கை மிகவும் ஆபத்தானது. இதனால் அமெரிக்கா பேச்சுவார்த்தைக்கு திரும்ப வேண்டிய சூழல் உருவாகும்” என்று தெரிவித்துள்ளார்.

தற்போது டிரம்ப்–ஸி சந்திப்பு சாத்தியமில்லாததாக தோன்றினாலும், முழுமையாக ரத்து செய்யப்படவில்லை என நிபுணர்கள் கூறுகின்றனர். சீனாவின் புதிய ஏற்றுமதி விதிகள் டிசம்பரில் அமலுக்கு வருவதால், அந்தக்காலத்திற்கு முன் பேச்சுவார்த்தைகள் மீண்டும் தொடங்கும் வாய்ப்பு உள்ளது.