புதிய பிரதமர் நியமனம் விரைவில் – மக்ரோனின் முடிவு

பிரான்ஸ் ஜனாதிபதி எம்மானுவேல் மக்ரோன் அடுத்த 48 மணிநேரத்திற்குள் புதிய பிரதமரை நியமிக்க இருப்பதாக ஜனாதிபதி அலுவலகம் புதன்கிழமை தெரிவித்துள்ளது. இது பிரான்ஸ் கடந்த பல தசாப்தங்களில் எதிர்கொண்ட மிக மோசமான அரசியல் நெருக்கடியை சமாளிக்கும் முயற்சியாகக் கருதப்படுகிறது.

சில நாட்களுக்கு முன்பு நியமிக்கப்பட்டிருந்த பிரதமர் செபாஸ்டியன் லெகோர்னு தனது பதவியை ராஜினாமா செய்திருந்தார். வெறும் சில மணி நேரங்களே பதவியில் இருந்த அவர், இதன் மூலம் பிரான்ஸ் வரலாற்றிலேயே மிகக் குறுகிய காலம் பதவி வகித்த பிரதமராக மாறினார்.

மக்ரோனின் வேண்டுகோளின் பேரில் லெகோர்னு பல்வேறு அரசியல் கட்சித் தலைவர்களுடன் ஆலோசனை நடத்தி, நெருக்கடியை தீர்க்க வழி தேடியுள்ளார். நாடாளுமன்ற உறுப்பினர்களின் பெரும்பாலோர் நாடாளுமன்ற கலைப்புக்கு எதிராக இருப்பதாகவும், நிதி மசோதாவை டிசம்பர் 31க்குள் நிறைவேற்ற முடியும் என்று அவரின் அறிக்கையில் குறிப்பிடப்பட்டுள்ளது. இதனை அடிப்படையாகக் கொண்டு ஜனாதிபதி மக்ரோன் விரைவில் புதிய பிரதமரை நியமிக்க உள்ளார்.

ஆனால் தற்போது எந்த அரசியல்வாதி அந்தப் பொறுப்பை ஏற்கப் போகிறார் என்பது குறித்து எந்த தகவலும் வெளிவரவில்லை. அரசியல் மைய இடது மற்றும் வலது அணிகளுக்கு இடையே சமரசம் இல்லாமல் இருப்பது நாட்டை கடுமையான அரசியல் சிக்கலில் தள்ளியுள்ளது.

லெகோர்னு கூறியதாவது, “2026 நிதியாண்டு மசோதாவை நிறைவேற்றுவதற்கான ஒரு பாதை இன்னும் இருக்கிறது. ஒப்பந்தம் எளிதில் சாத்தியமில்லை, ஆனால் ஜனாதிபதி மக்ரோன் விரைவில் புதிய பிரதமரை நியமிப்பார் என நம்புகிறேன்” என்று தெரிவித்தார்.

இதற்கிடையில் மக்ரோனிடம் இருந்து பாராளுமன்றத் தேர்தலை உடனடியாக நடத்த வேண்டும் அல்லது அவர் ராஜினாமா செய்ய வேண்டும் என்ற கோரிக்கை தீவிரமடைந்துள்ளது. வலதுசாரி கட்சித் தலைவர் மரீன் லெபென் மற்றும் இடதுசாரி ஜீன்-லூக் மெலென்சான் ஆகியோர் இருவரும் மக்ரோனின் நடவடிக்கைகளை கடுமையாக விமர்சித்துள்ளனர்.

இதேவேளை, இடதுசாரி கட்சிகள் அடுத்த அரசை தாங்களே அமைக்க விருப்பம் தெரிவித்துள்ளன. அவர்கள் பிரான்ஸின் மிகச் செல்வந்த 0.01% மக்களிடம் இருந்து 2% செல்வ வரி வசூலிக்கவும், மக்களிடையே கடும் எதிர்ப்பை சந்தித்த ஓய்வூதிய திருத்தச் சட்டத்தை ரத்து செய்யவும் வலியுறுத்தியுள்ளனர்.

அரசியல் கலக்கத்தால் பங்குச்சந்தை பாதிக்கப்பட்டிருந்தாலும், லெகோர்னுவின் நம்பிக்கையூட்டும் அறிக்கை வெளியான பின்னர் பாரிஸ் CAC 40 குறியீடு 1.1% உயர்ந்துள்ளது.

மொத்தத்தில், பிரான்ஸ் அரசியல் மையத்தில் ஏற்பட்டுள்ள நம்பிக்கையின்மை மக்ரோனுக்கு கடுமையான சவாலாக மாறியுள்ளது. அடுத்த பிரதமர் யார் என்பதே தற்போது நாடு முழுவதும் முக்கியக் கேள்வியாக உள்ளது.