காசா போருக்கு தீர்வு காண எகிப்தில் பேச்சுவார்த்தை

அமெரிக்க ஜனாதிபதி டொனால்ட் டிரம்ப், காசா போருக்குத் தீர்வு காணும் முயற்சிகளில் ஈடுபட்டுள்ள அனைவரையும் “விரைவாக செயல்பட” அழைத்துள்ளார்.

ஹமாஸ் மற்றும் இஸ்ரேல் இடையேயான மறைமுக சமாதான பேச்சுவார்த்தைகள் திங்கள்கிழமை எகிப்தில் நடைபெற உள்ள நிலையில், அவர் இந்தக் கருத்தை தெரிவித்துள்ளார்.

ஹமாஸ், அமெரிக்கா முன்வைத்த 20 அம்சங்களைக் கொண்ட சமாதானத் திட்டத்தின் சில பகுதிகளை ஏற்றுக்கொண்டுள்ளது. இதில் கைதிகளை விடுவித்தல் மற்றும் காசா நிர்வாகத்தை பாலஸ்தீன நிபுணர்களுக்கு ஒப்படைத்தல் ஆகியவை அடங்கும்.

ஆனால் சில முக்கிய அம்சங்களில், குறிப்பாக ஆயுதங்கள் ஒப்படைத்தல் மற்றும் எதிர்காலத்தில் காசா நிர்வாகத்தில் பங்கு பெறாதது போன்ற கோரிக்கைகள் குறித்து பேச்சுவார்த்தை தொடர விரும்புவதாக ஹமாஸ் தெரிவித்துள்ளது.

டிரம்ப் தனது சமூக வலைதளத்தில் “பேச்சுவார்த்தைகள் மிகவும் வெற்றிகரமாக நடந்து வருகின்றன. முதல் கட்டம் இந்த வாரத்திற்குள் முடிவடைய வேண்டும். அனைவரும் விரைவாகச் செயல்பட வேண்டும்” என்று கூறினார். மேலும், “நேரம் மிக முக்கியம்; இல்லையெனில் மிகப்பெரிய இரத்தப்பாசரிப்பு ஏற்படும்” என்றும் எச்சரித்தார்.

இந்நிலையில், ஹமாஸ் பதில் அளித்த பிறகும் இஸ்ரேல் காசா மீது வான்வழி தாக்குதல்களைத் தொடர்ந்தது. இதேவேளை, இஸ்ரேல் அரசு பேச்சாளர் ஷோஷ் பெட்ரோசியன் கூறுகையில், “சில இடங்களில் குண்டுவீச்சு தற்காலிகமாக நிறுத்தப்பட்டிருந்தாலும், தற்போது எந்தத் தற்காலிக சமாதான ஒப்பந்தமும் இல்லை” என தெரிவித்தார்.

இஸ்ரேல் பிரதமர் பெஞ்சமின் நேதன்யாகு, “அமெரிக்க நிர்வாகத்துடன் உள்ள ஒப்பந்தத்தின் அடிப்படையில் பேச்சுவார்த்தைகள் மிகபட்சம் சில நாட்களில் முடிவடையும்” எனக் கூறி, இஸ்ரேல் பிரதிநிதிகள் குழுவை எகிப்துக்குப் புறப்படுமாறு உத்தரவிட்டுள்ளார்.

மறுபுறம், ஹமாஸ் பிரதிநிதி குழுவை தலைமை தாங்கும் கலில் அல்-ஹய்யா ஞாயிற்றுக்கிழமை கெய்ரோ வந்தடைந்துள்ளார். அமெரிக்க சிறப்பு தூதர் ஸ்டீவ் விட்ட்காஃப், டிரம்பின் மருமகன் ஜேரட் குஷ்னர் மற்றும் கட்டார் வெளியுறவு அமைச்சர் ஷேக் முகம்மது பின் அப்துரஹ்மான் அல் தானியும் கலந்துகொள்ள உள்ளனர்.

இந்த பேச்சுவார்த்தைகள் போர் தொடங்கியதிலிருந்து மிக முக்கியமானவையாகக் கருதப்படுகின்றன. இது போருக்கு முடிவுக் காணும் பாதையைத் திறக்குமா என்பது குறித்து சர்வதேச சமூகம் கவனமாகக் காத்திருக்கிறது.

இந்நிலையில், நேபாள எல்லை பகுதியில் ஏற்பட்ட கனமழையால் ஏற்பட்ட நிலச்சரிவு மற்றும் வெள்ளத்தில் குறைந்தது 47 பேர் உயிரிழந்துள்ளனர். பல சாலைகள் அடித்துச் செல்லப்பட்டுள்ளன.


காசா சுகாதார அமைச்சகம் தெரிவித்ததாவது, கடந்த 24 மணிநேரத்தில் மட்டும் இஸ்ரேல் தாக்குதல்களில் 65 பேர் உயிரிழந்துள்ளனர். அக்டோபர் 2023 இல் ஹமாஸ் நடத்திய தாக்குதலுக்கு பதிலாக இஸ்ரேல் நடத்திய ராணுவ நடவடிக்கைகளில் இதுவரை 67,000க்கும் மேற்பட்டோர் உயிரிழந்துள்ளனர் என கூறப்படுகிறது.

தற்போது, இரு தரப்பினரிடையே பெரும் நம்பிக்கையின்மை நிலவினும், எகிப்தில் தொடங்க உள்ள இந்த பேச்சுவார்த்தைகள் காசா போருக்குத் தீர்வு காணும் முக்கியமான வாய்ப்பாக உலகம் முழுவதும் பார்க்கப்படுகிறது.