கௌரி கிஷனின் உடல் எடை கேள்விக்கு அதிரடி ரியாக்ஷன்

‘அதர்ஸ்’ திரைப்படத்தின் செய்தியாளர் சந்திப்பில் நடிகை கௌரி கிஷனிடம் சில யூடியூபர்கள் அளவுக்கு மீறிய கேள்விகளை எழுப்பியதால் நிகழ்ச்சி சர்ச்சையாக மாறியது. அந்த படத்தின் ஹீரோவிடம், “இந்த ஹீரோயினை தூக்கி நடித்தீர்கள், அவருடைய உடல் எடை எவ்வளவு?” என்ற அநாகரீகமான கேள்வி கேட்கப்பட்டதாக தகவல்கள் வெளியாகியிருந்தன.

இந்த விவகாரம் குறித்து பின்னர் நடந்த தனியார் இணையதள நேர்காணலில் தொகுப்பாளர் இதை குறித்து கேள்வி எழுப்பியபோது, கௌரி கிஷன் அதிர்ச்சியுடன் “Stupid question” என கடுமையாக பதிலளித்தார். இதனையடுத்து, சில யூடியூபர்கள் மற்றும் அவர் இடையே வாக்குவாதம் ஏற்பட்டது.

அப்போது கௌரி கிஷன், “என்னுடைய எடையை தெரிந்து கொள்வதுதான் அவசியமா?” என தைரியமாக எதிர்கேள்வி எழுப்பினார். வாக்குவாதம் கடுமையாக வளர்ந்ததுடன், அவர் சிறிது நேரம் உணர்ச்சி வசப்பட்டு கண் கலங்கினார்.

பின்னர், யூடியூபர்கள் “நீங்கள் மன்னிப்பு கேட்க வேண்டும்” என கூறியபோது, கௌரி கிஷன், “மன்னிப்பு கேட்க வேண்டியது நீங்கள் தான்” என தைரியமாக கூறியதுடன், சமூக வலைத்தளங்களில் பெரும் பாராட்டை பெற்றுள்ளார்.

இந்த சம்பவத்திற்குப் பிறகு, பல ரசிகர்கள் கௌரி கிஷனின் தைரியத்தையும் தன்னம்பிக்கையையும் பாராட்டி வருகின்றனர். “அவமானமான கேள்விகளுக்கும் தைரியமாக எதிர்நின்று பதிலளித்திருப்பது பெண்களுக்கு ஒரு எடுத்துக்காட்டு” என நெட்டிசன்கள் புகழ்ந்து வருகின்றனர்.