ஹர்மன்ப்ரீத் கவுரின் சொத்து மதிப்பு எவ்வளவு தெரியுமா?

உலகக்கோப்பையை வென்ற இந்திய மகளிர் கிரிக்கெட் அணியின் கேப்டன் ஹர்மன்ப்ரீத் கவுர் தற்போது நாடு முழுவதும் பேசப்படும் பெயராகியுள்ளார். தென்னாப்பிரிக்காவுக்கு எதிரான வரலாற்றுச் சிறப்புமிக்க வெற்றிக்கு பிந்தைய தினமே, அவர் பற்றிய தகவல்கள் சமூக வலைதளங்களில் வைரலாகி வருகின்றன. குறிப்பாக அவரது சொத்து மதிப்பு மற்றும் வருமான விவரங்கள் ரசிகர்களை ஆச்சரியப்படுத்தியுள்ளது.

பஞ்சாபைச் சேர்ந்த ஹர்மன்ப்ரீத் கவுர், 2009 ஆம் ஆண்டிலிருந்து சர்வதேச கிரிக்கெட்டில் விளையாடி வருகிறார். இந்திய மகளிர் கிரிக்கெட்டின் முகமாக மாறிய அவர், தற்போது டெஸ்ட், ஒருநாள் மற்றும் டி20 வடிவங்களில் சிறப்பாக விளங்கி வருகிறார். சமீபத்திய தகவல்களின் படி, ஹர்மன்ப்ரீத் கவுரின் மொத்த சொத்து மதிப்பு ரூ. 30 கோடிக்கு மேல் உயர்ந்துள்ளது என மதிப்பிடப்படுகிறது.

பிசிசிஐயின் A-கேட்டகிரியில் உள்ளவர் என்ற முறையில் ஆண்டுக்கு ரூ. 50 லட்சம் வரை சம்பளம் பெறுகிறார். மேலும் ஒவ்வொரு டெஸ்ட் போட்டிக்கும் ரூ. 15 லட்சம், ஒருநாள் போட்டிக்கு ரூ. 6 லட்சம், டி20 போட்டிக்கு ரூ. 3 லட்சம் என தனி ஊதியங்களும் வழங்கப்படுகின்றன. இதைத் தவிர, மகளிர் ஐபிஎல் தொடரில் மும்பை இந்தியன்ஸ் அணியின் கேப்டனாக விளையாடும் அவர், ஒரு சீசனுக்கு ரூ. 1 கோடிக்கும் மேற்பட்ட ஒப்பந்தத்தை பெற்றுள்ளார்.

அதோடு, PUMA, CEAT, HDFC Life, BigFlex போன்ற முன்னணி பிராண்டுகளின் விளம்பர முகமாகவும் பணிபுரிகிறார். இவற்றின் மூலம் ஆண்டுக்கு ரூ. 60 லட்சம் முதல் ரூ. 1 கோடி வரை வருமானம் ஈட்டுகிறார்.

விளையாட்டுத் துறையில் அவர் சாதித்த வெற்றியைப் பாராட்டி, பஞ்சாப் அரசு அவருக்கு டி.எஸ்.பி. பதவி வழங்கியுள்ளது. தற்போது ஹர்மன்ப்ரீத் கவுர் இந்திய மகளிர் கிரிக்கெட்டின் பெருமையாக மட்டுமின்றி, விளையாட்டின் மூலம் பொருளாதார ரீதியாகவும் சிறந்த முன்னுதாரணமாக திகழ்கிறார்.

உலகக்கோப்பை வெற்றிக்குப் பிறகு, பல புதிய ஸ்பான்சர்கள் அவரை அணுகி வருவதாகவும், அவரது சொத்து மதிப்பு வருகிற மாதங்களில் மேலும் உயர வாய்ப்புள்ளதாகவும் கூறப்படுகிறது.