இரவு நேர தூக்கக் குறைபாட்டின் மறைமுக ஆபத்துகள்

நவீன வாழ்க்கை முறையால் பலருக்கும் இரவு 12 மணிக்குப் பின் தான் தூங்கும் பழக்கம் வந்துவிட்டது. வேலை காரணமாகவோ, இணையம் மற்றும் மொபைல் பயன்பாட்டாலோ, அல்லது சீரற்ற வாழ்க்கை முறையாலோ இந்த பழக்கம் அதிகரித்து வருகிறது.

ஆனால் மனித உடலின் இயற்கை கடிகாரம் (biological clock) இரவு நேரத்தில் உடல் ஓய்வெடுக்கும்படி அமைந்துள்ளது. அதனை மீறி தாமதமாக தூங்குவதால் பலவிதமான உடல் மற்றும் மன நல பிரச்சனைகள் தோன்றுகின்றன.

முதலாவதாக, தூக்கக் குறைபாடு உடலின் நோய் எதிர்ப்பு சக்தியை பாதிக்கிறது. நள்ளிரவுக்குப் பின் தூங்குபவர்களுக்கு போதிய ‘deep sleep’ கிடைக்காமல் போகிறது.

இதனால் உடலில் உள்ள செல்கள் சீரமைக்கப்படாமல், சோர்வு, தலைவலி, மன அழுத்தம் போன்ற பிரச்சனைகள் அதிகரிக்கின்றன. மேலும், நீண்டகாலமாக இப்படியான பழக்கம் தொடர்ந்தால் இதய நோய், சர்க்கரை நோய், உயர் ரத்த அழுத்தம் போன்ற அபாயங்கள் அதிகரிக்கின்றன.

அடுத்ததாக, தூக்கக் குறைபாடு உடல் எடையையும் பாதிக்கிறது. ஆராய்ச்சிகள் தெரிவிப்பதாவது, இரவு நேரத்தில் தாமதமாக தூங்குபவர்களுக்கு பசியைக் கட்டுப்படுத்தும் ஹார்மோன்கள் பாதிக்கப்படுகின்றன. இதனால் அதிக பசி, ஜங்க் புட் மீது ஈர்ப்பு அதிகரித்து உடல் பருமன் பிரச்சனை உருவாகிறது.

மனநலத்திற்கும் இது பெரிய சவாலாக அமைகிறது. நள்ளிரவு தூக்கம் குறையும்போது மூளை ஓய்வு பெறுவதில்லை.

இதனால் concentration குறைவு, கோபம், மன அழுத்தம், மனச்சோர்வு போன்றவை ஏற்படும் அபாயம் உள்ளது. குறிப்பாக மாணவர்கள் மற்றும் இளம் வயதினருக்கு இது கல்வி மற்றும் தொழில் வளர்ச்சிக்கு தடையாக அமையும்.

அறிவியல் ரீதியாக, மனித உடல் இரவு 10 மணி முதல் அதிகாலை 4 மணி வரை தான் முழுமையான ஓய்வு பெறும் விதத்தில் ஹார்மோன்களை சுரக்கிறது.

மெலடோனின் எனப்படும் தூக்க ஹார்மோன் அந்த நேரத்தில் அதிக அளவில் உற்பத்தியாகிறது. ஆனால் இரவு 12 மணிக்குப் பின் தூங்கினால், அந்த ஹார்மோன் சுரப்பு குறைந்து உடல் முழுமையாக சீரமைக்கப்படுவதில்லை.

எனவே, ஆரோக்கியமான வாழ்க்கையை நடத்த விரும்பினால், இரவு 10.30 முதல் 11 மணி வரை தூங்குவதற்கு முயல வேண்டும்.

நள்ளிரவு வரை விழித்திருக்கும் பழக்கத்தை குறைத்து, தூக்க நேரத்தை ஒழுங்குபடுத்தினால் உடல் ஆரோக்கியம் மட்டுமின்றி, மனநிலையும் சீராக இருக்கும். தூக்கம் என்பது ஒரு luxury அல்ல, அது உடலுக்குத் தேவையான அடிப்படைத் தேவையாகும் என்பதை நாம் நினைவில் கொள்ள வேண்டும்.