இன்று பல மாகாணங்களில் கன மழை வாய்ப்பு

இன்று (24) மேற்கு, சபரகமுவ, மத்திய, வடமேற்கு மாகாணங்களிலும், காலி மற்றும் மாத்தறை மாவட்டங்களிலும் இடியுடன் கூடிய மழை அல்லது மிதமான மழை பெய்யக்கூடும் என வானிலை திணைக்களம் தெரிவித்துள்ளது. இவ்விடங்களில் சில பகுதிகளில் 50 மில்லிமீட்டருக்கு மேற்பட்ட கனமழை பெய்யும் வாய்ப்பு உள்ளது.

வடக்கு மற்றும் வட மத்திய மாகாணங்களில் சில நேரங்களில் மழை பெய்யும். உவா மாகாணத்திலும், மட்டக்களப்பு மற்றும் அம்பாறை மாவட்டங்களிலும் பிற்பகல் 1.00 மணிக்குப் பிறகு சில இடங்களில் இடியுடன் கூடிய மழை பெய்யும் என்று எதிர்பார்க்கப்படுகிறது.

மேலும், மத்திய மலைநாட்டின் மேற்குப் பகுதிகளிலும், மேற்கு, வடக்கு, வட மத்திய, வடமேற்கு, தெற்கு மாகாணங்களிலும் மற்றும் திருகோணமலை மாவட்டத்திலும், 40 முதல் 50 கிலோமீட்டர் வேகத்தில் பலமான காற்று வீசக்கூடும் என வானிலை திணைக்களம் தெரிவித்துள்ளது.

இடியுடன் கூடிய மழை பெய்யும் வேளைகளில் ஏற்படக்கூடிய தற்காலிக பலத்த காற்று மற்றும் மின்னல் தாக்கத்தால் ஏற்படும் சேதங்களை குறைப்பதற்காக பொதுமக்கள் தேவையான முன்னெச்சரிக்கை நடவடிக்கைகளை எடுக்குமாறு கேட்டுக்கொள்ளப்பட்டுள்ளனர்.