இந்தியாவில் குழந்தையை தத்தெடுக்க தேவையான விதிமுறைகள்

இன்றைய இளைஞர்கள் திருமணத்தைத் தவிர்த்து தனித்துவமான வாழ்க்கை முறையைத் தேர்வு செய்யும் சூழலில், பலர் ஒற்றைப் பெற்றோராகவோ அல்லது குழந்தைகளை தத்தெடுக்கவோ விரும்புகிறார்கள். ஆனால் இந்தியாவில் குழந்தை தத்தெடுப்பது ஒரு நீண்ட மற்றும் சட்டரீதியான செயல்முறையாகும். இதை சிறார் நீதி (குழந்தைகள் பராமரிப்பு மற்றும் பாதுகாப்பு) சட்டம், 2015 மற்றும் மத்திய தத்தெடுப்பு ஆணையம் (CARA – Central Adoption Resource Authority) மூலம் நிர்வகிக்கப்படுகிறது.

தத்தெடுக்க விரும்பும் பெற்றோர் முதலில் CARA இணையதளமான Carings Portal வழியாக பதிவு செய்ய வேண்டும். இதற்கு பிறகு, அடையாளச் சான்று, வருமானச் சான்று, மருத்துவ அறிக்கை, காவல்துறை சரிபார்ப்பு உள்ளிட்ட ஆவணங்கள் சமர்ப்பிக்கப்பட வேண்டும். பதிவு செய்யப்பட்டவுடன், குழந்தை இல்ல அதிகாரிகள் வீட்டு ஆய்வை மேற்கொண்டு, பெற்றோரின் பொருளாதார நிலை, மனநிலை, மற்றும் வாழ்வாதார சூழலை மதிப்பாய்வு செய்வார்கள். இந்தச் செயல்முறை முடிந்ததும், தத்தெடுக்க விரும்பும் பெற்றோருக்கு ஒரு குழந்தை ஒதுக்கப்படும். முழு செயல்முறையும் 6 மாதங்கள் முதல் 1 ஆண்டுவரை எடுத்துக் கொள்ளலாம்.

தத்தெடுப்புக்கான செலவுகள்


இந்தியாவில் தத்தெடுப்புக்கான கட்டணங்கள் CARA ஆணையத்தால் நிர்ணயிக்கப்படுகின்றன. பதிவு கட்டணம் மற்றும் வீட்டு ஆய்வு கட்டணம் சேர்த்து ரூ.6,000 வரை இருக்கும். குழந்தையின் பராமரிப்புக்கான கார்பஸ் கட்டணம் ரூ.50,000 வரை நிர்ணயிக்கப்பட்டுள்ளது. கூடுதலாக சட்டச் செலவுகள் ரூ.20,000 முதல் ரூ.50,000 வரை இருக்கலாம். மொத்தம், இந்தியாவில் வசிக்கும் தம்பதிகள் அல்லது ஒற்றைப் பெற்றோர் ஒருவர் குழந்தையை தத்தெடுக்க ரூ.2 லட்சம் முதல் ரூ.2.5 லட்சம் வரை செலவாகும். வெளிநாட்டில் வசிக்கும் இந்தியர்கள் தத்தெடுக்க விரும்பினால், ஏஜென்சி கட்டணம், சட்டச் செலவுகள் மற்றும் பயணச் செலவுகள் சேர்த்து ரூ.25 லட்சம் முதல் ரூ.37 லட்சம் வரை ஆகலாம்.

திருமணமாகாதவர்கள் தத்தெடுக்க முடியுமா?


இந்திய சட்டத்தின் படி, திருமணம் ஆகாத ஆண்களும் பெண்களும் தத்தெடுக்கலாம். ஆனால் சில நிபந்தனைகள் உள்ளன. திருமணம் ஆகாத ஆண்கள் ஆண் குழந்தைகளை மட்டுமே தத்தெடுக்க முடியும். அவர்களின் குறைந்தபட்ச வயது 25 ஆண்டுகள் ஆக வேண்டும், மேலும் தத்தெடுக்கும் குழந்தையுடன் குறைந்தபட்சம் 21 ஆண்டுகள் வயது வித்தியாசம் இருக்க வேண்டும். திருமணம் ஆகாத பெண்கள் ஆண் அல்லது பெண் குழந்தைகளையும் தத்தெடுக்க முடியும். அவர்களுக்கும் குறைந்தபட்ச வயது 25 ஆண்டுகள் தேவைப்படுகிறது.

வயது வரம்பு


ஒற்றைப் பெற்றோர் 4 வயது வரை உள்ள குழந்தைகளை தத்தெடுக்க 25 முதல் 45 வயதுக்குள் இருக்க வேண்டும். 5 முதல் 8 வயது வரை உள்ள குழந்தைகளுக்கு 25 முதல் 50 வயது வரம்பு, 9 முதல் 18 வயது வரை உள்ள குழந்தைகளுக்கு 25 முதல் 55 வயது வரம்பு உள்ளது. 55 வயதுக்கு மேற்பட்ட ஒற்றைப் பெற்றோருக்கு தத்தெடுப்பதற்கான அனுமதி கிடைக்காது.

திருமணமான தம்பதிகள் தத்தெடுக்க விரும்பினால், குறைந்தது இரண்டு வருட திருமண ஸ்திரத்தன்மையை நிரூபிக்க வேண்டும். மேலும் அவர்கள் வயது வரம்பு தம்பதிகளின் கூட்டு வயதின் அடிப்படையில் அமையும். 2 வயது குழந்தைக்கு அதிகபட்சம் 85 வயது, 4 வயது குழந்தைக்கு 90 வயது, 8 வயது குழந்தைக்கு 100 வயது, 18 வயது குழந்தைக்கு 110 வயது வரை இருக்கலாம்.

மொத்தத்தில், இந்தியாவில் தத்தெடுப்பு என்பது சமூகப் பொறுப்பு மிக்க செயல் என்பதோடு சட்ட ரீதியான விழிப்புணர்வு மற்றும் நிதி ஸ்திரத்தன்மை அவசியமானது. சரியான வழிமுறையில் செல்லும் பெற்றோருக்கு இது குழந்தையின் வாழ்க்கையையும் தங்களுடைய வாழ்க்கையையும் மாற்றும் ஒரு அரிய வாய்ப்பாகும்.