இளமையாக இருக்க வீட்டிலேயே செய்யலாம் வேப்பிலை சோப்பு

பெண்கள் மட்டுமல்லாமல், அனைவரும் தங்கள் முகம் எப்போதும் சுத்தமாகவும், பிரகாசமாகவும் இருக்க வேண்டும் என்று விரும்புகிறார்கள்.

ஆனால் சூரிய கதிர்கள், தூசி, மாசு, வியர்வை மற்றும் பிற காரணங்களால் முகத்தில் சுருக்கங்கள், பருக்கள், கருமை மற்றும் பிற சரும பிரச்சனைகள் தோன்றும்.

இவற்றை தவிர்க்கவும், சருமத்தை இயற்கையாக பராமரிக்கவும் வேப்பிலை மிகச் சிறந்த மூலிகை ஆகும்.

வேப்பிலையின் கிருமிநாசினி மற்றும் அழற்சி தடுக்கும் தன்மைகள் சருமத்தில் ஏற்படும் பல்வேறு பிரச்சனைகளை நீக்க உதவுகின்றன.

இப்போது, வீட்டிலேயே எளிதாக செய்யக்கூடிய வேப்பிலை சோப்பின் தயாரிப்பு முறையை பார்க்கலாம்.

தேவையான பொருட்கள்

• சோப்பு கட்டி – 1 துண்டு

• வேப்பிலை – 2 கைப்பிடி

• தேங்காய் எண்ணெய் – 2 ஸ்பூன்

தயாரிக்கும் முறை

முதலில் வேப்பிலையை நன்கு கழுவி சுத்தம் செய்து, மிக்ஸியில் சிறிதளவு தண்ணீர் சேர்த்து நன்றாக அரைத்துக் கொள்ளவும். இந்த அரைத்த வேப்பிலை விழுதில் தேங்காய் எண்ணெயை சேர்த்து நன்றாக கலக்கவும்.

பின்னர் ஒரு பாத்திரத்தில் தண்ணீர் ஊற்றி கொதிக்கவைத்து, அதன்மேல் மற்றொரு பாத்திரத்தில் சோப்பு கட்டியை வைத்து ‘டபுள் போய்லர்’ முறையில் மெதுவாக கரைக்கவும். சோப்பு முழுவதும் கரைந்தவுடன், அதில் வேப்பிலை-தேங்காய் எண்ணெய் கலவையை சேர்த்து நன்றாக கலந்து கொள்ளவும்.

இப்போது இந்த கலவையை சோப்பு அச்சுகளில் ஊற்றி, 15 நிமிடங்கள் ஃபிரிட்ஜில் வைக்கவும் அல்லது அறை வெப்பத்தில் 2 மணி நேரம் வைத்து காயவிடவும். இதனால் இயற்கையான, ரசாயனமற்ற வேப்பிலை சோப்பு தயார்.

பயன்படுத்தும் முறை

இந்த வேப்பிலை சோப்பை தினசரி முகம் மற்றும் உடலை கழுவ பயன்படுத்தலாம். இது சருமத்தில் உள்ள அழுக்கை நீக்கி, பருக்கள் மற்றும் கருமையை குறைத்து, சருமத்தை சுத்தமாகவும் ஆரோக்கியமாகவும் வைத்திருக்க உதவும்.