அமெரிக்கா கிரிக்கெட் இடைநீக்கம் – ICC அதிரடி

சர்வதேச கிரிக்கெட் கவுன்சில் (ICC) அமெரிக்கா கிரிக்கெட் அமைப்பின் உறுப்பினர் அந்தஸ்தை உடனடியாக இடைநிறுத்துவதாக அறிவித்துள்ளது.

கடந்த ஒன்றாண்டு காலமாக நடைபெற்ற விரிவான ஆய்வு மற்றும் பல தரப்பினருடன் நடந்த ஆலோசனைகளின் பின்னர் இந்தத் தீர்மானம் எடுக்கப்பட்டதாக ICC தெரிவித்துள்ளது.

அமெரிக்கா கிரிக்கெட் தனது உறுப்பினர் பொறுப்புகளை நிறைவேற்றத் தவறியது, செயற்படும் ஆட்சி அமைப்பை உருவாக்கவில்லை, அமெரிக்க ஒலிம்பிக் மற்றும் பாராலிம்பிக் குழுவின் (USOPC) தேசிய நிர்வாக அந்தஸ்தை பெற முன்னேற்றம் காட்டவில்லை, மேலும் அமெரிக்காவிலும் உலகளாவிய அளவிலும் கிரிக்கெட்டிற்கு மதிப்பிழப்பு ஏற்படுத்தும் செயல்களில் ஈடுபட்டது என்பன காரணங்களாகக் கூறப்பட்டுள்ளது.

எனினும், அமெரிக்க தேசிய அணிகள் ICC நிகழ்வுகளில் பங்கேற்கும் உரிமையைத் தொடரும். 2028 லாஸ் ஏஞ்சல்ஸ் ஒலிம்பிக் போட்டிகளுக்கான (LA28) தயாரிப்புகளும் பாதிக்கப்பட மாட்டாது என்று ICC உறுதியளித்துள்ளது.

தேசிய அணிகளின் மேலாண்மை மற்றும் நிர்வாகம் தற்காலிகமாக ICC அல்லது அதனால் நியமிக்கப்பட்ட பிரதிநிதிகள் மூலம் மேற்கொள்ளப்படும்.

இதன் மூலம் வீரர்கள் தொடர்ந்து ஆதரவு பெறுவதைவும், உயர்தர பயிற்சி மற்றும் வீரர் மேம்பாட்டு திட்டங்கள் தடையின்றி நடைபெறுவதைவும் உறுதி செய்யப்படுகிறது.

மேலும், அமெரிக்கா கிரிக்கெட் மீண்டும் உறுப்பினர் அந்தஸ்தைப் பெற வேண்டிய நிபந்தனைகளை விளக்குவதற்காக ICC ‘நார்மலைசேஷன் கமிட்டி’ நியமிக்கப்பட்டுள்ளது. ஆட்சி அமைப்பு, செயற்பாடு மற்றும் கிரிக்கெட் சூழலில் தகுந்த நிலையை அடையும் வகையில் குறிப்பிட்ட மாற்றங்களைச் செய்ய வேண்டும்.

ICC வெளியிட்ட தகவலின்படி, 2024 ஆம் ஆண்டு நடைபெற்ற ஆண்டுக்கான பொதுக்கூட்டத்தில் அமெரிக்கா கிரிக்கெட்டின் செயல்பாடுகள் விதிமுறைகளுக்கு ஏற்ப இல்லாததால் ‘எச்சரிக்கை பட்டியலில்’ சேர்க்கப்பட்டது. அடுத்த 12 மாதங்களில் குறைபாடுகளைச் சரிசெய்யும்படி அறிவுறுத்தப்பட்டிருந்தும், அவை நிறைவேற்றப்படாததால் 2025 ஆம் ஆண்டின் பொதுக்கூட்டத்தில் இடைநீக்கம் செய்யும் முடிவு எடுக்கப்பட்டதாகவும் குறிப்பிடப்பட்டுள்ளது.

ICC தனது அறிவிப்பில், “இந்த இடைநீக்கம் கிரிக்கெட்டின் நீண்டகால நலன்களைப் பாதுகாக்கும் விதமாக மேற்கொள்ளப்பட்ட அவசியமான ஒரு நடவடிக்கை. ஆனால் வீரர்கள் பாதிக்கப்படமாட்டார்கள், அவர்களின் முன்னேற்றம் தொடரும்” என்று வலியுறுத்தியுள்ளது.