நீண்ட முடியின் ரகசியம் - ஜான்வி கபூரின் எண்ணெய் எது?

பாலிவுட் நடிகை ஜான்வி கபூர் எப்போதும் தன் தலைமுடி அழகால் ரசிகர்களை ஈர்த்துக் கொண்டிருப்பவர்.

அவர் தலைமுடி திறந்த நிலையில் இருந்தாலும் சரி, பாரம்பரியமாகச் செட்டிங் செய்திருந்தாலும் சரி, அது எப்போதும் அடர்த்தியாகவும், ஆரோக்கியமாகவும், பளபளப்பாகவும் இருக்கும்.

சமீபத்தில், அளித்த பேட்டியில், ஜான்வி தனது மறைந்த தாய், புகழ்பெற்ற நடிகை ஸ்ரீதேவி அளித்த சிறப்பு தலைமுடி பராமரிப்பு ரகசியத்தை வெளிப்படுத்தினார்.

அவரது கூறுகையில், ஸ்ரீதேவி வீட்டிலேயே நெல்லிக்காய் மற்றும் உலர்ந்த பூக்கள் சேர்த்து தனிப்பட்ட முறையில் முடி எண்ணெயைத் தயாரித்து வந்தார்.

“அம்மா எங்களுக்காக நெல்லிக்காய், பூக்கள் சேர்த்து ஒரு சிறப்பு எண்ணெயைச் செய்வார். பிறகு, மூன்று நாட்களுக்கு ஒருமுறை எனக்கும் குஷிக்கும் தலையில் எண்ணெய் தடவி மசாஜ் செய்து விடுவார்,” என்று ஜான்வி நினைவுகூர்ந்தார்.

இந்த பழக்கம் தலைமுடிக்கு வெளிப்புற ஊட்டச்சத்தை அளிப்பதோடு மட்டுமல்லாமல், பல ஆண்டுகளாக ஆரோக்கியமாகவும் வலுவாகவும் வைத்திருந்தது என்று அவர் குறிப்பிட்டார்.

தலைமுடிக்கான எண்ணெய் மசாஜ் பலரால் அலட்சியம் செய்யப்படும் ஒரு பழக்கம் தான். ஆனால் இது முடி வளர்ச்சிக்கும் ஆரோக்கியத்துக்கும் மிக முக்கியமான பங்கு வகிக்கிறது.

மெதுவான வட்ட இயக்கங்களில் உச்சந்தலையில் மசாஜ் செய்வதால் இரத்த ஓட்டம் அதிகரித்து, அத்தியாவசிய ஊட்டச்சத்துக்கள் வேகமாக வேர்களை அடைகின்றன. இது முடி நார்களை வலுப்படுத்துவதோடு மட்டுமல்லாமல், புதிய முடி வளர்ச்சிக்கும் உதவுகிறது.

அதோடு, வெப்ப சேதம், அதிக ஸ்டைலிங், மாசு போன்றவற்றிலிருந்து பாதுகாப்பு அளிக்கிறது. ஒரு நல்ல எண்ணெய் மசாஜ் உடல் சோர்வையும் மன அழுத்தத்தையும் குறைக்கும் தன்மை கொண்டது.

வீட்டிலேயே நெல்லிக்காய் எண்ணெயை எளிதாகத் தயாரிக்கலாம். 3 முதல் 4 புதிய நெல்லிக்காய்களை அரைத்து சாறை பிரித்தெடுக்கவும்.

ஒரு சிறிய பாத்திரத்தில் இரண்டு தேக்கரண்டி தேங்காய் எண்ணெயை சூடாக்கி, அதில் நெல்லிக்காய் சாற்றை கலந்து விடவும்.

கலவையை குளிர வைத்து குறைந்தது இரண்டு நாட்கள் ஓய்வில் வைக்க வேண்டும். அதன் பிறகு ஒரு பாட்டிலில் சேமித்து வைத்து தேவையானபோது பயன்படுத்தலாம்.

இந்த எண்ணெயை வாரத்தில் குறைந்தது மூன்று முறை தலையில் மசாஜ் செய்வது மிகவும் பயனுள்ளதாகும். இது பொடுகை குறைக்கும், முடி வேர்களை வலுப்படுத்தும், மேலும் தலைமுடிக்கு இயற்கையான பளபளப்பையும் ஆரோக்கியத்தையும் அளிக்கும்.