கேரளா இடுக்கியில் நிலச்சரிவு: பல வீடுகள் மண்ணுக்குள்!

கேரளா மாநிலத்தின் இடுக்கி மாவட்டத்தில் நேற்று இரவு ஏற்பட்ட திடீர் நிலச்சரிவு பேரழிவை ஏற்படுத்தியுள்ளது. மலையடி பகுதியில் நடைபெற்ற சாலைவிரிவாக்கப் பணியின் போது ஏற்பட்ட இந்த நிலச்சரிவில் ஆறு வீடுகள் மண்ணுக்குள் புதைந்தன.

அடிமாலி அருகே தேசிய நெடுஞ்சாலையோரத்தில் மலை அடிவாரத்தில் ஏராளமான குடியிருப்புகள் அமைந்துள்ளன. அங்கு சாலையை விரிவுபடுத்தும் பணிக்காக மலை வெட்டும் பணி நடைபெற்று வந்தது. அந்த நேரத்தில் மலையின் ஒரு பெரிய பகுதி திடீரென சரிந்து விழுந்தது. இதனால் அருகில் இருந்த வீடுகள் சில நொடிகளில் மண் குவியலுக்குள் புதைந்து போனது.

இந்த சம்பவத்தில் பைஜூ என்ற நபர் உயிரிழந்ததாக அதிகாரிகள் உறுதி செய்துள்ளனர். அவரது மனைவி சந்தியா தீவிர காயங்களுடன் மருத்துவமனையில் சிகிச்சை பெற்று வருகிறார். சம்பவ இடத்துக்கு விரைந்து சென்ற தேசிய பேரிடர் மீட்புப் படையினர் (NDRF) இரவு முழுவதும் தேடுதல் மற்றும் மீட்பு பணிகளில் ஈடுபட்டனர்.

முன்னெச்சரிக்கை நடவடிக்கையாக மலை அடிவாரத்தில் வசித்து வந்த மேலும் 22 குடும்பங்கள் பாதுகாப்பான இடங்களுக்கு மாற்றப்பட்டுள்ளன. கடுமையான மழை காரணமாக அந்தப்பகுதியில் நிலச்சரிவு அபாயம் தொடர்ந்துள்ளதாக வானிலை ஆய்வுத் துறை எச்சரிக்கை விடுத்துள்ளது.

இந்த சம்பவம் மாநிலம் முழுவதும் அதிர்ச்சியை ஏற்படுத்தியுள்ளது. அரசு உடனடி நிவாரண நடவடிக்கைகளை மேற்கொண்டு, பாதிக்கப்பட்ட குடும்பங்களுக்கு தற்காலிக தங்குமிட வசதிகள் ஏற்பாடு செய்துள்ளது.