கரூர் துயரம்: உயர் நீதிமன்றம் அவசர விசாரணை நீக்கம்

கரூரில் நடிகர்–அரசியல்வாதி விஜய் தலைமையிலான தமிழக வெற்றி கழக (TVK) பொதுக்கூட்டத்தில் நிகழ்ந்த கூட்ட நெரிசல் விபத்து தொடர்பான அவசர விசாரணையை இன்று (28) மதராஸ் உயர் நீதிமன்றம் ரத்து செய்தது.

மாலை 4.30 மணிக்கு விசாரணை நடத்துவதாக ஒதுக்கப்பட்டிருந்த இந்த வழக்கு, கரூர் மாவட்டத்தைச் சேர்ந்த என்.செந்தில்கண்ணன் தாக்கல் செய்த மனுவின் பேரில் அவசரமாக பட்டியலிடப்பட்டது.

ஆனால், ஆவணங்களை பரிசீலித்த நீதிமன்றம், இது புதிய வழக்கு அல்ல; ஏற்கெனவே நிலுவையில் உள்ள “டிவிகே பொதுக்கூட்டங்களுக்கு போலீஸ் அனுமதி” தொடர்பான வழக்கில் இணைக்கப்பட்ட மனுவாக இருப்பதால் அவசர விசாரணையை நீக்கியது.

இதற்கிடையில், கரூர் கூட்ட நெரிசல் விபத்தில் உயிரிழந்தோர் எண்ணிக்கை 40 ஆக உயர்ந்துள்ளதாக போலீசார் தெரிவித்தனர். சனிக்கிழமை மாலை வேலுசாமிபுரத்தில் விஜயின் தேர்தல் பிரச்சாரத்தில் பங்கேற்க ஆயிரக்கணக்கானோர் திரண்டிருந்தனர். கூட்டம் முடிவடைந்தபோது ஏற்பட்ட குழப்பம் மற்றும் நெரிசலால் ஏற்பட்ட பரபரப்பில் பலர் மிதிபட்டு உயிரிழந்தனர்.

உயிரிழந்தவர்களில் 9 பேர் குழந்தைகள் ஆவர். மேலும் பலர் தற்போது மருத்துவமனையில் சிகிச்சைப் பெற்று வருகிறார்கள், சிலரின் நிலைமை கவலைக்கிடமாக உள்ளது.

முதல்வர் மு.க.ஸ்டாலின் அதிகாலை கரூர் மருத்துவக்கல்லூரி மருத்துவமனைக்கு சென்று காயமடைந்தவர்களை சந்தித்து ஆறுதல் கூறினார். உயிரிழந்தோர் குடும்பங்களுக்கு ரூ.10 இலட்சம், காயமடைந்தவர்களுக்கு ரூ.1 லட்சம் நிவாரணம் வழங்கப்படும் என்றும், ஓய்வு பெற்ற உயர் நீதிமன்ற நீதிபதியால் விசாரணை நடத்த உத்தரவிட்டுள்ளதாகவும் அவர் தெரிவித்துள்ளார்.

இதுகுறித்து எதிர்க்கட்சித் தலைவர் எடப்பாடி கே.பழனிசாமி கடும் கண்டனம் தெரிவித்தார். “முன்கூட்டியே பெரும் திரளான மக்கள் வருவார்கள் என்பது தெரிந்திருந்தும், கூட்டக் கட்டுப்பாடு மற்றும் அடிப்படை வசதிகள் போதியளவில் செய்யப்படவில்லை. இது தவிர்க்கக்கூடிய விபத்து” என அவர் குற்றம்சாட்டினார்.

விஜய் தனது சமூக வலைதளப் பதிவில், இந்த நிகழ்வை “சொல்ல முடியாத இழப்பு” என்றும், உயிரிழந்தோரின் குடும்பங்களுக்கு ரூ.20 இலட்சமும், காயமடைந்தோருக்கு ரூ.2 இலட்சமும் வழங்குவதாகவும் அறிவித்தார்.

இந்திய பிரதமர் நரேந்திர மோடியும் தனது இரங்கலைத் தெரிவித்துள்ளார். பிரதமரின் தேசிய நிவாரண நிதியிலிருந்து உயிரிழந்தோரின் குடும்பத்துக்கு தலா ரூ.2 இலட்சமும், காயமடைந்தோருக்கு தலா ரூ.50 ஆயிரமும் வழங்கப்படும் என அறிவிக்கப்பட்டுள்ளது.

கரூர் சம்பவம் தமிழக அரசியல் கூட்டங்களின் பாதுகாப்பு ஏற்பாடுகள் குறித்த கேள்விகளை எழுப்பியுள்ளது.