ரஷ்யாவின் ஒரு பகுதிக்கு சுனாமி எச்சரிக்கை

ரஷ்யாவின் கம்‌ஷாட்கா தீபகற்ப கடலோரத்தில் சனிக்கிழமை அதிகாலை 7.4 ரிக்டர் அளவிலான சக்திவாய்ந்த நிலநடுக்கம் ஏற்பட்டுள்ளது.

அமெரிக்க புவியியல் ஆய்வு மையம் (USGS) தெரிவித்ததன்படி, இந்த நிலநடுக்கம் பெட்ரோபவ்லோவ்ஸ்க்-கம்‌ஷாட்ஸ்கி நகரத்திற்கு கிழக்கே 111 கிலோமீட்டர் தொலைவில், 39.5 கிலோமீட்டர் ஆழத்தில் பதிவாகியுள்ளது.

ஆரம்பத்தில் 7.5 ரிக்டர் என மதிப்பிடப்பட்ட நிலையில், பின்னர் அது 7.4 என குறைக்கப்பட்டது.

பசிபிக் சுனாமி எச்சரிக்கை மையம், ரஷ்யாவின் அருகிலுள்ள கடற்கரைகளில் ஒரு மீட்டர் உயரம் வரையிலான ஆபத்தான அலைகள் எழலாம் என எச்சரித்துள்ளது.

அதேசமயம், ஜப்பான், ஹவாய் மற்றும் பசிபிக் தீவுகளில் 30 செ.மீ உயரம் குறைவான அலைகள் உருவாகும் அபாயம் இருப்பதாக தெரிவித்துள்ளது.

கடந்த ஜூலை மாதத்தில் கம்‌ஷாட்கா தீபகற்பத்தை அண்டிய கடலோரத்தில் 8.8 ரிக்டர் அளவிலான சக்திவாய்ந்த நிலநடுக்கம் பதிவானது. அப்போது நான்கு மீட்டர் உயரம் வரை சுனாமி அலைகள் எழுந்ததால், ஹவாய் முதல் ஜப்பான் வரை மக்கள் பாதுகாப்பான இடங்களுக்கு வெளியேற்றப்பட்டனர்.

அது, 2011 ஜப்பான் நிலநடுக்கத்திற்கு அடுத்த மிகப்பெரிய அதிர்வாக உலக வரலாற்றில் இடம்பெற்றது.

இந்நிலையில், சமீபத்திய 7.4 ரிக்டர் நிலநடுக்கம் காரணமாக, ரஷ்ய கம்‌ஷாட்கா கடற்கரையோர மக்கள் அனைவரும் அவசர எச்சரிக்கையுடன் பாதுகாப்பு நடவடிக்கைகளில் ஈடுபட வேண்டிய சூழல் உருவாகியுள்ளது.