மரியா கொரினா மச்சடோவுக்கு 2025 நோபல் சமாதான விருது

வெனிசுலாவின் எதிர்க்கட்சித் தலைவர் மரியா கொரினா மச்சடோக்கு 2025 ஆம் ஆண்டிற்கான நோபல் சமாதான விருது வழங்கப்பட்டுள்ளது.

“வெனிசுலா மக்களின் ஜனநாயக உரிமைகளுக்காக அவர் மேற்கொண்ட இடைவிடா போராட்டத்திற்கும், அடக்குமுறையிலிருந்து சமாதானமான ஜனநாயக மாற்றத்தை ஏற்படுத்திய முயற்சிக்குமான அங்கீகாரமாக” இந்த விருது வழங்கப்படுவதாக நோர்வே நோபல் குழு அறிவித்துள்ளது.

மச்சடோ, வெனிசுலாவில் ஜனநாயகத்தை மீட்டெடுக்க தொடர்ந்து போராடி வரும் முக்கிய அரசியல் தலைவர்களில் ஒருவராகக் கருதப்படுகிறார். அவரது இயக்கம், நீண்டகாலம் ஆட்சியில் இருந்த அடக்குமுறை அரசுக்கு எதிரான மக்களின் குரலாக இருந்து வருகிறது.

இந்த ஆண்டில் நோபல் குழு வெனிசுலாவை மையமாகக் கொண்டு முடிவெடுத்தது குறிப்பிடத்தக்கது. அதே நேரத்தில், அமெரிக்க அதிபர் டொனால்ட் டிரம்ப் தனது பொது உரைகளில் தானும் நோபல் சமாதான விருதுக்குரியவர் என்று கூறி வந்த நிலையில், நோபல் குழுவின் இந்த தீர்மானம் சர்வதேச அளவில் கவனம் ஈர்த்துள்ளது.

நோபல் குழுவுடன் இணைந்த நிபுணர்கள், டிரம்ப் உலக அமைதி மற்றும் சர்வதேச ஒற்றுமைக்கு எதிரான நடவடிக்கைகளை மேற்கொண்டதால், அவருக்கு விருது வழங்கப்படும் வாய்ப்பு குறைவாக இருந்தது என தெரிவித்தனர்.

நோபல் சமாதான விருது, சுமார் 1.2 மில்லியன் அமெரிக்க டாலர் மதிப்புடையது (11 மில்லியன் ஸ்வீடிஷ் க்ரோன்). டிசம்பர் 10 ஆம் தேதி, நோபல் விருதுகளை நிறுவிய ஸ்வீடிஷ் தொழிலதிபர் அல்ஃப்ரெட் நோபலின் நினைவு நாளன்று, நோர்வே தலைநகர் ஓஸ்லோவில் நடைபெறும் விழாவில் இந்த விருது வழங்கப்படும்.