நேபாள நாடாளுமன்றத்தில் GenZ போராட்டாத்தால் தீ வைப்பு

நேபாள பிரதமர் கே.பி. ஷர்மா ஒலி தனது பதவியிலிருந்து ராஜினாமா செய்வதற்கு சில நிமிடங்களுக்கு முன், ஜென் Z போராட்டக்காரர்கள் நாடாளுமன்ற வளாகத்திற்குள் புகுந்து, அங்குள்ள ஒரு கட்டிடத்துக்கு தீ வைத்தனர்.

போராட்டக்காரர்கள் ஒலியின் பாக்தபூர் மாவட்ட பால்கோட் பகுதியில் உள்ள இல்லத்தையும், பல்வேறு மூத்த அரசியல் தலைவர்களின் வீடுகளையும் தீ வைத்தனர்.

சமூக ஊடகத் தடை காரணமாக தொடங்கிய போராட்டம் பரவலாக வன்முறையாக மாறியுள்ளது.

நாடாளுமன்ற வளாகத்தில் புகுந்த ஆயிரக்கணக்கான போராட்டக்காரர்கள், கருப்பு புகை குமிழியுடன் தீ பரவிய காட்சிகள் ஊடகங்களில் வெளியாகின.

தீ பரவிய நிலையில் கூட, ஆயிரக்கணக்கான இளைஞர்கள் கையில் கொடிகளுடன் கோஷமிட்டபடி நாடாளுமன்றத்தை நோக்கி முன்னேறினர்.

சிங்கா துர்பார் வளாகத்திற்குள் நுழைந்த போராட்டக்காரர்கள்

நாட்டின் முக்கிய நிர்வாக வளாகமான சிங்கா துர்பாரின் மேற்குக் கதவை உடைத்து போராட்டக்காரர்கள் அங்கு நுழைந்தனர். அவர்கள் அந்தக் கதவுக்கும் தீ வைத்தனர்.

“கே.பி. திருடன், நாடை விட்டு போ” மற்றும் “ஊழல் தலைவர்களுக்கு நடவடிக்கை எடு” என பல கோஷங்கள் எழுப்பப்பட்டன.

முன்னாள் உள்துறை அமைச்சர் ரமேஷ் லெகாக் ராஜினாமா செய்த ஒரு நாளுக்குப் பிறகு, அவரது இல்லமும் தீக்கிரையாக்கப்பட்டது. கடந்த வாரம் அரசாங்கம் 26 சமூக ஊடக தளங்களை பேஸ்புக், வாட்ஸ்அப், இன்ஸ்டாகிராம், யூடியூப் உள்ளிட்டவை – தடை செய்ததை எதிர்த்து மாணவர்கள் மற்றும் இளைஞர்கள் போராட்டத்தில் ஈடுபட்டனர்.

உயிரிழப்பும் காயமுமாகிய நிலை

இதுவரை நடந்த வன்முறைகளில் 19 பேர் உயிரிழந்துள்ளனர், 300க்கும் மேற்பட்டோர் காயமடைந்துள்ளனர்.

போலீசார் தண்ணீர் பீரங்கி, கண்ணீர் புகை மற்றும் ரப்பர் குண்டுகளை பயன்படுத்தியதாக தகவல்கள் தெரிவிக்கின்றன.

போராட்டம் தீவிரமாகும் நிலையில், பிரதமர் ஒலி மீது அழுத்தம் அதிகரித்ததால் அவர் ராஜினாமா செய்தார்.

நூற்றுக்கணக்கான போராட்டக்காரர்கள் அவரது அலுவலகத்துக்குள் நுழைந்து எதிர்ப்பு கோஷங்களை எழுப்பிய சில நிமிடங்களுக்குப் பிறகே அவர் பதவி விலகினார்.

விமான நிலையத்தில் விமான சேவைகள் நிறுத்தம்

போராட்டக்காரர்கள் தனியார் வீடுகள் மற்றும் அரச கட்டிடங்களை சேதப்படுத்தத் தொடங்கியதால், பாதுகாப்பு காரணங்களுக்காக திரிபுவன் சர்வதேச விமான நிலையத்தில் (TIA) அனைத்து விமானங்களும் ரத்து செய்யப்பட்டன.

ஆனால் விமான நிலையம் மூடப்படவில்லை என்று பொதுமேலாளர் ஹன்சா ராஜ் பாண்டே விளக்கம் அளித்துள்ளார்.

நேபாளத்தில் நிலைமை என்ன?

இளைஞர்களால் முன்னெடுக்கப்பட்ட ஜென் Z போராட்டம், சமூக ஊடக தடையை எதிர்த்து தொடங்கியது. தடை நீக்கப்பட்டபோதிலும், உயிரிழப்புகளுக்கான நீதி கேட்டு போராட்டம் தொடர்கிறது.

தலைநகர் காட்மாண்டுவின் முக்கிய பகுதிகளில் இராணுவமும் போலீசும் கண்காணிப்பை வலுப்படுத்தி, தடை உத்தரவுகளை அமல்படுத்தி வருகின்றன.

செவ்வாயன்று, நேபாள காங்கிரஸ் கட்சியின் மைய அலுவலகமும் போராட்டக்காரர்களால் சேதப்படுத்தப்பட்டது.

நாட்டின் அரசியல் நிலைமை தீவிர சிக்கலுக்கு ஆளாகியிருக்கும் நிலையில், இளைஞர்கள் ஊழல் ஒழிப்பு மற்றும் சீர்திருத்தங்களை வலியுறுத்தி தொடர்ந்து போராடி வருகின்றனர்.