நேபாளத்தின் முதல் பெண் பிரதமர் – சுஷிலா கார்கி

நேபாள அதிபர் ராம்சந்திர பவுடேல், புதிய இடைக்கால பிரதமராக நியமிக்கப்பட்ட சுஷிலா கார்கியின் பரிந்துரையின் பேரில் வெள்ளிக்கிழமை பாராளுமன்றத்தின் கீழ்சபையை கலைத்து, வரும் 2026 மார்ச் 21ஆம் தேதி பொதுத் தேர்தலை அறிவித்தார்.

73 வயதான கார்கி, முன்னாள் தலைமை நீதிபதியாக இருந்தவர். வெள்ளிக்கிழமை இரவு பதவியேற்று, நேபாளத்தின் முதல் பெண் பிரதமர் ஆனார்.

சமீபத்திய அரசியல் கலவரங்களின் காரணமாக KP ஷர்மா ஓலி தலைமையிலான அரசு சிதைந்ததைத் தொடர்ந்து, நாடு முழுவதும் பரவிய வன்முறையால் பதவி விலக வேண்டிய சூழ்நிலை ஏற்பட்டது.

குறிப்பாக, சமூக ஊடகத் தடை தீர்மானமே இந்தப் போராட்டங்களுக்கு காரணமாக அமைந்தது.

கட்டாய நிலைமையை கருத்தில் கொண்டு, அரசியல் கட்சிகள், இராணுவம், சட்ட நிபுணர்கள், குடிமக்கள் பிரதிநிதிகள் மற்றும் போராட்ட இளைஞர்களுடன் ஆலோசித்த பிறகே அதிபர் கார்கியை பிரதமராக நியமித்தார்.

பதவியேற்பு விழா ஷீதல் நிவாஸ் அதிபர் மாளிகையில் நடைபெற்றது. அதிபர் பவுடேல், கார்கிக்கு சத்தியப்பிரமாணம் செய்து வைத்தபோது, “இதயம் கனிந்த வாழ்த்துகள், நீங்கள் நிச்சயம் நாட்டை காப்பாற்றி வெற்றி பெறுவீர்கள்” என்று தெரிவித்தார்.

முன்னாள் பிரதமர் பபுராம் பட்டரை, நீதித்துறை மற்றும் இராணுவ உயரதிகாரிகள், தூதர்கள் உள்ளிட்டோர் நிகழ்வில் கலந்துகொண்டனர்.

விழாவுக்குப் பிறகு, Gen Z போராட்ட இயக்கத்தைச் சேர்ந்த இளைஞர்கள் மகிழ்ச்சியுடன் தெருக்களில் கூடினர்.

சமூக ஊடகங்களில் வாழ்த்து செய்திகள் வெள்ளம் போல பரவின. “முதல் பெண் பிரதமருக்கு வாழ்த்துக்கள்” என ஒரு பயனர் குறிப்பிட்டார். மற்றொருவர், “நாட்டை காப்பாற்றி, கட்டியெழுப்ப வெற்றி பெறுங்கள். இதை சாத்தியமாக்கிய Gen Zக்கு நன்றி” என்று பதிவு செய்தார்.

இப்போது நேபாளம், இடைக்கால பிரதமராக இருக்கும் கார்கியின் தலைமையில், பல தசாப்தங்களில் இல்லாத அளவிற்கு நடந்த அரசியல் வன்முறையின் பின் நிலையை சமன் செய்வதோடு, அடுத்த தேர்தலுக்கான தயாரிப்பையும் ஒருங்கிணைக்க வேண்டிய கடின சவாலைச் சந்தித்து வருகிறது.