நைஜீரியாவில் தங்கச் சுரங்கம் சரிவு

நைஜீரியாவின் சாம்பரா (Zamfara) மாநிலத்தில் தங்கச் சுரங்கம் ஒன்று சரிந்ததில் குறைந்தது 100-க்கும் மேற்பட்டோர் உயிரிழந்திருக்கலாம் என்று உயிர் பிழைத்தவர்கள் மற்றும் அப்பகுதி மக்கள் வெள்ளிக்கிழமை தெரிவித்தனர்.

மாரு மாவட்டத்தின் கதவுரி (Kadauri) பகுதியில் அமைந்துள்ள சுரங்கம், வியாழக்கிழமை பல தங்கத் தொழிலாளர்கள் அடித்தளத்தில் வேலை செய்துகொண்டிருந்தபோது திடீரென சரிந்துவிட்டதாக சாட்சியர்கள் ரெய்ட்டர்ஸ் செய்தி நிறுவனத்துக்கு தெரிவித்தனர். மீட்புப் பணிகள் வெள்ளிக்கிழமையிலும் தொடர்ந்து நடைபெற்றன.

மீட்புப்பணிகளில் ஈடுபட்ட உள்ளூர் குடியிருப்பாளர் சனுசி அவ்வால், இதுவரை 13 பேரின் உடல்கள் சுரங்கத்தில் இருந்து மீட்கப்பட்டதாகவும், அதில் தனது உறவினரும் அடங்குவதாகவும் தெரிவித்தார். “சரிவின்போது 100-க்கும் மேற்பட்டோர் உள்ளே இருந்தனர்” என்றும் அவர் குறிப்பிட்டார்.

“நாங்கள் உயிருடன் மீட்கப்பட்டதில் அதிர்ஷ்டசாலிகள். 100 பேருக்கு மேல் இருந்த நிலையில், எங்களைப் போல 15 பேரையே உயிருடன் மீட்டனர்” என்று காயமடைந்து சிகிச்சை பெற்று வரும் ஈசா சானி தெரிவித்தார்.

சாம்பரா மாநில சுரங்கத் தொழிலாளர் சங்கத்தைச் சேர்ந்த முஹம்மது ஈசா, இந்த விபத்தை உறுதி செய்ததுடன், பலரை மீட்க முயன்ற சிலர் கூட சுவாசக் குறைவால் உயிரிழந்ததாகவும் குறிப்பிட்டார்.

இந்நிலையில், சாம்பரா மாநில காவல்துறை பேச்சாளர் யசீத் அபுபக்கர் தொடர்பு கொள்ளப்பட்டபோதும் எந்த பதிலும் அளிக்கவில்லை.

சாம்பரா மாநிலத்தில் சட்டவிரோத தங்கச் சுரங்கப் பணிகள் வழக்கமான ஒன்றாகும். அங்கு ஆயுதக் குழுக்கள் தங்கச் சுரங்கங்களை கட்டுப்படுத்துவதால் வன்முறைகளும், உயிரிழப்புகளும் அடிக்கடி நடைபெற்று வருகின்றன.