தாயால் கைவிடப்பட்ட ஒரு மாதக் குழந்தை மீட்பு

அனுராதபுரம் மாவட்ட இபலோகமா, கொன்வெவா பகுதியில் மாதம் வயது கொண்ட பெண் குழந்தை ஒன்று தாயால் கைவிடப்பட்ட நிலையில் பையில் இருந்து நேற்று (02) மீட்கப்பட்டதாக தகவல் வெளியாகியுள்ளது.

ஓய்வுபெற்ற குடும்ப சுகாதார அலுவலர் இந்திராணி அனுலா அவர்களின் வீட்டின் முன் ஒரு நாற்காலியில் சந்தேகத்துக்கிடமான பை வைக்கப்பட்டிருந்தது. அதிகாலை 6.00 மணியளவில் அவர் வீட்டு கதவைத் திறந்தபோது அந்த பை அசைவதை கவனித்தார். உடனடியாக பையைத் திறந்தபோது, அதற்குள் குழந்தை இருப்பது தெரியவந்தது.

குழந்தையின் மருத்துவச் சான்றிதழும் பையினுள் இருந்தது. அதில், குழந்தை சுமார் ஒரு மாதத்திற்கு முன்பு பிறந்தது குறிப்பிடப்பட்டிருந்தாலும், தாயின் பெயர் மற்றும் பிறந்த இடம் அழிக்கப்பட்டிருந்தது. பையினுள் குழந்தையின் பால் பாட்டில், ஆடைகள், பால் பொடி உள்ளிட்ட தேவையான பொருட்களும் வைக்கப்பட்டிருந்தன.

குழந்தை உடனடியாக நிகவெரட்டிய அடிப்படை வைத்தியசாலைக்கு கொண்டு செல்லப்பட்டது. பரிசோதித்த மருத்துவர்கள், குழந்தையின் உடல்நிலை நன்றாகவே இருப்பதாக தெரிவித்தனர்.

“நான் மூன்று வருடங்களுக்கு முன்பு ஓய்வுபெற்ற குடும்ப சுகாதார அலுவலர். குழந்தை எடை குறைவாக இருப்பதை உணர்ந்தேன். உடனடியாக பையில் உள்ள பொருட்களையும் பார்த்தேன். பின்னர் சம்பவத்தை காவல்துறையினரிடம் அறிவித்தேன்,” என்று இந்திராணி அனுலா கூறியுள்ளார்.

இந்தச் சம்பவம் தொடர்பில், தாயின் இருப்பிடத்தை கண்டறிய மாகோ காவல்துறை தலைமையக ஆய்வாளர் A.A.P.A. குலதுங்க அவர்களின் வழிகாட்டுதலின்படி, குழந்தைகள் மற்றும் மகளிர் பிரிவு OIC, IP அபேக்ஷா தலைமையில் மேலதிக விசாரணைகள் இடம்பெற்று வருகின்றன.