பாக்–ஆப்கான் போர் நிறுத்தம் நீட்டிப்பு அறிவிப்பு

பாகிஸ்தான் மற்றும் ஆப்கானிஸ்தான் இடையிலான 48 மணி நேர போர் நிறுத்த ஒப்பந்தம், டோஹாவில் நடைபெற்று வரும் சமாதான பேச்சுவார்த்தை நிறைவடையும் வரை நீட்டிக்கப்பட்டுள்ளதாக பாகிஸ்தான் பாதுகாப்புத் துறை அதிகாரிகளும், ஆப்கான் தாலிபான் வட்டாரங்களும் உறுதிப்படுத்தியுள்ளன.

பாகிஸ்தான் பிரதிநிதிகள் ஏற்கனவே டோஹாவை வந்தடைந்துள்ள நிலையில், ஆப்கான் பிரதிநிதிகள் சனிக்கிழமை கட்டாரின் தலைநகரை அடைவார்கள் எனத் தகவல்கள் தெரிவிக்கின்றன. ஆப்கான் தாலிபான் பேச்சாளர் சபிஹுல்லா முஜாஹித், “பாகிஸ்தான் தாக்குதல் நடத்தாத வரை, எங்கள் படைகள் அமைதியைத் தொடரும்” எனக் கூறியுள்ளார்.

இரு நாடுகளும் கடந்த வாரம் கடுமையான மோதலில் ஈடுபட்டு, டஜன் கணக்கானோர் உயிரிழந்து, பல நூறு பேர் காயமடைந்தனர். இதைத் தொடர்ந்து புதன்கிழமையன்று தற்காலிக போர் நிறுத்தம் அறிவிக்கப்பட்டது.

பாகிஸ்தான் ராணுவமும், வெளியுறவுத் துறையும் இதுகுறித்து கருத்து தெரிவிக்க மறுத்துள்ளன. ஆனால், இந்த போர் நிறுத்தம் மூலம் டோஹா நகரில் நடக்கும் பேச்சுவார்த்தைக்கு ஒரு வாய்ப்பு உருவாகியுள்ளது.

2019-ஆம் ஆண்டு வரை நெருங்கிய கூட்டாளிகளாக இருந்த இரு நாடுகள், சமீபத்தில் மீண்டும் மோதலுக்கு திரும்பியுள்ளன. அமெரிக்க ராணுவம் ஆப்கானிஸ்தானிலிருந்து விலகிய பின், தாலிபான் ஆட்சிக்கு வந்ததைத் தொடர்ந்து பாகிஸ்தான் எல்லைப்பகுதிகளில் தீவிரவாத தாக்குதல்கள் அதிகரித்துள்ளன.

இந்த தாக்குதல்களுக்கு ஆப்கானிஸ்தானில் தஞ்சமடைந்த தீவிரவாதிகள் காரணம் என பாகிஸ்தான் குற்றம் சாட்டியுள்ளது. இதற்குப் பதிலாக ஆப்கான் தாலிபான், “பாகிஸ்தான் தவறான தகவல்கள் பரப்புகிறது. நாங்கள் எந்த தீவிரவாதக் குழுக்களுக்கும் தஞ்சமளிக்கவில்லை,” என மறுத்துள்ளது.

இதற்கிடையில், பாகிஸ்தான் எல்லை பகுதியில் நடந்த தற்கொலைத் தாக்குதலில் ஏழு பாகிஸ்தான் ராணுவ வீரர்கள் உயிரிழந்ததாகவும், 13 பேர் காயமடைந்ததாகவும் பாதுகாப்பு அதிகாரிகள் தெரிவித்துள்ளனர். வெடிகுண்டு ஏந்திய வாகனத்துடன் ஒரு தீவிரவாதி ராணுவ முகாமின் சுவரில் மோதியபோது, இரண்டு பேர் முகாமுக்குள் நுழைய முயன்றதாகவும், அவர்கள் சுட்டுக்கொல்லப்பட்டதாகவும் தகவல்கள் கூறுகின்றன.

பாகிஸ்தான் பிரதமர் ஷெஹ்பாஸ் ஷெரிஃப், “தொடர்ச்சியான தாக்குதல்களுக்கு பின் எங்கள் பொறுமை கெட்டுவிட்டது. அதனால் தான் பதிலடி கொடுக்க நேர்ந்தது. ஆனால் பேச்சுவார்த்தையூடாக பிரச்சினை தீர்க்க நாங்கள் தயாராக உள்ளோம்,” என தெரிவித்துள்ளார்.

இரு இஸ்லாமிய நாடுகளுக்கிடையேயான இந்த மோதல் கடந்த பல தசாப்தங்களில் மிகக் கடுமையானதாகும். இதனால் சவூதி அரேபியா மற்றும் கட்டார் ஆகிய நாடுகள் நடுநிலை வகித்து அமைதியை நிலைநிறுத்த முயற்சி மேற்கொண்டு வருகின்றன.

இதேவேளை, அமெரிக்க அதிபர் டொனால்ட் டிரம்ப், “இந்த மோதலைத் தீர்க்க நாங்கள் உதவ தயாராக உள்ளோம்” என்று தெரிவித்துள்ளார்.