பிலிப்பைன்ஸில் நிலநடுக்கம் – குறைந்தது 31 உயிரிழப்பு

பிலிப்பைன்ஸ் மையப்பகுதியை கடந்த சில நாட்களுக்கு முன் புயல் தாக்கிய நிலையில், செவ்வாய்க்கிழமை இரவு கடலோரத்தில் ஏற்பட்ட 6.9 ரிக்டர் அளவிலான சக்திவாய்ந்த நிலநடுக்கம் பல வீடுகளின் சுவர்களையும் கட்டிடங்களையும் இடித்துச் சிதறடித்து, குறைந்தது 31 பேரை பலிகொண்டது. பலர் காயமடைந்தனர். மின் விநியோகம் பாதிக்கப்பட்டதால் மக்கள் இருட்டில் வீடுகளை விட்டு வெளியில் ஓடி பாதுகாப்பாக தஞ்சம் அடைந்தனர் என அதிகாரிகள் தெரிவித்தனர்.

நிலநடுக்க மையம், செபூ மாகாணத்தின் கடலோர நகரமான போகோவின் வடகிழக்கே 19 கி.மீ தொலைவில், 5 கி.மீ ஆழத்தில் ஏற்பட்டது. சுமார் 90,000 மக்கள் வசிக்கும் போகோ நகரிலேயே 14 பேர் உயிரிழந்துள்ளனர் என்று பேரிடர் மேலாண்மை அதிகாரி ரெக்ஸ் ய்காட் தெரிவித்தார்.

போகோ நகரில் உயிரிழந்தோரின் எண்ணிக்கை மேலும் அதிகரிக்கக்கூடும் என்று அதிகாரிகள் அஞ்சுகின்றனர். மலைப்பகுதியில் நிலச்சரிவு ஏற்பட்டு, பாறைகள் இடிந்து விழுந்ததால் அங்குள்ள குடிசை வீடுகளில் சிக்கியவர்களை மீட்க பின்தள்ளி இயந்திரங்கள் கொண்டு செல்லும் பணி நடைபெற்று வருகிறது.

மேடெல்லின் என்ற ஊரில், பெரும்பாலானோர் தூங்கிக் கொண்டிருந்தபோது, வீடுகளின் சுவர்கள் மற்றும் கூரைகள் இடிந்து விழுந்ததில் குறைந்தது 12 பேர் உயிரிழந்துள்ளனர்.

போகோ அருகிலுள்ள சான் ரெமிஜியோ நகரில், நிலநடுக்கம் ஏற்பட்டதும் கூடைப்பந்து ஆட்டம் நடைபெற்று கொண்டிருந்த இடத்தில் சுவர் இடிந்து விழுந்ததில், கடலோர காவல்படை வீரர்கள் 3 பேர், தீயணைப்பு வீரர் ஒருவர் மற்றும் ஒரு சிறுமி என 5 பேர் தனித்தனியாக உயிரிழந்தனர்.

அங்குள்ள துணை மேயர் ஆல்ஃபி ரெய்னஸ், நகரின் நீர்விநியோக அமைப்பு சேதமடைந்ததால், மக்களுக்கு உணவும் தண்ணீரும் அவசரமாக தேவைப்படுவதாகக் கூறினார்.

போகோவில் வீடுகளுடன், ஒரு தீயணைப்பு நிலையம் மற்றும் சாலைகளும் கடுமையாக சேதமடைந்தன. “நாங்கள் ஓய்வெடுக்கத் தயாராக இருந்தபோது நிலம் கடுமையாக அதிர்ந்தது. ஓடிச் செல்லும்போது தரையில் விழுந்துவிட்டோம்” என்று தீயணைப்பு வீரர் ரே கன்யெட்டே தெரிவித்தார். அவரும், சக வீரர்களும் காயமடைந்தனர்.

நூற்றுக்கணக்கான மக்கள் வீடுகளுக்குத் திரும்ப மறுத்து, தீயணைப்பு நிலையம் அருகே வெளியில் தஞ்சமடைந்தனர். சாலைகளில் ஆழமான பிளவுகள் ஏற்பட்டுள்ளன. அருகிலுள்ள பழமையான கத்தோலிக்க தேவாலயம் கூட சேதமடைந்தது.

செபூ மாநில ஆளுநர் பாமிலா பாரிகுவாட்ரோ, சேதத்தின் முழுமையான நிலைமை பகலில்தான் தெரியும் எனவும், “இது நாங்கள் நினைப்பதைவிடக் கடுமையாக இருக்கலாம்” எனவும் தெரிவித்தார்.

பிலிப்பைன்ஸ் எரிமலைவியல் மற்றும் நிலநடுக்க ஆய்வு நிறுவனம், செபூ மற்றும் அருகிலுள்ள மாகாணங்களுக்கு சுனாமி எச்சரிக்கை விடுத்தது. பின்னர் அசாதாரண அலைகள் பதிவாகாததால் எச்சரிக்கை நீக்கப்பட்டது.

கடந்த வார வெள்ளிக்கிழமை புயல் தாக்கி, வெள்ளப் பெருக்கு மற்றும் மரங்கள் விழுந்ததில் குறைந்தது 27 பேர் பலியாகி, பல நகரங்களில் மின்சாரம் துண்டிக்கப்பட்டு, ஆயிரக்கணக்கானோர் இடம்பெயர வேண்டிய நிலை ஏற்பட்டிருந்தது.

பசிபிக் "ரிங் ஆஃப் பயர்" பகுதியில் அமைந்திருப்பதால், பிலிப்பைன்ஸ் அடிக்கடி நிலநடுக்கம், எரிமலை வெடிப்பு, புயல் போன்ற இயற்கை பேரிடர்களை எதிர்கொள்வது குறிப்பிடத்தக்கது.