கீவ் பயணம் – உக்ரைனியர்களுக்கு ஆதரவாக ஹாரி

இங்கிலாந்தின் இளவரசர் ஹாரி, போரால் காயமடைந்து வாழ்க்கைமாறும் சவால்களை எதிர்கொள்ளும் உக்ரைனியர்களுக்கு உதவிகொடுக்கும் நிறுவனம் ஒன்றின் அழைப்பின் பேரில், திடீர் பயணமாக கீவ் சென்றடைந்தார்.

“காயமடைந்த இராணுவ வீரர்கள் மீளக்கூடிய நடவடிக்கைகளுக்கு முடிந்தவரை உதவ வேண்டும்” என்ற உறுதியுடன் வெள்ளிக்கிழமை காலை ரயில் மூலம் கீவ் சென்றடைந்த அவர், முழுநாள் அட்டவணையில் பங்கேற்க உள்ளார் எனத் தெரிவிக்கப்பட்டுள்ளது.

ஆனால் உத்தியோகபூர்வ விவரங்கள் இன்று மாலை வரை வெளியாகாது என எதிர்பார்க்கப்படுகிறது.

“சூப்பர்ஹியூமன்ஸ்” என்ற அமைப்பின் அழைப்பின் பேரில்தான் இப்பயணம் நடைபெற்றது. காயமடைந்தவர்களுக்கு செயற்கைக் கை, கால் உள்ளிட்ட புனர்வாழ்வு உதவிகளை வழங்கும் இந்நிறுவனத்தின் நிறுவனர் ஒல்ஹா ருட்னியேவா, ஹாரியை ரயிலில் இறங்கியவுடன் அன்புடன் அணைத்து வரவேற்றார். பாரம்பரியமான உக்ரைனிய தேநீர் கண்ணாடி வைத்திருக்கும் வெள்ளி ஸ்டாண்ட் ஒன்றையும் அவர் பரிசளித்தார்.

இதற்கு முன்பு, ஹாரி கடந்த ஏப்ரல் மாதம் ல்விவ் நகரில் அமைந்துள்ள இந்த அமைப்பின் மையத்தைப் பார்வையிட்டிருந்தார். ஆனால் தலைநகர் கீவுக்கான இது அவரது முதல் பயணமாகும்.

ரஷ்யாவின் முழுமையான படையெடுப்பினால், ஆயிரக்கணக்கான உக்ரைனிய ராணுவ வீரர்கள் மற்றும் பொதுமக்கள் கை, கால் துண்டிப்புகளுக்கு உள்ளாகியுள்ளனர். அதிகாரப்பூர்வ ராணுவ உயிரிழப்புகள் குறித்து உக்ரைன் புள்ளிவிபரங்களை வெளிப்படுத்தாததால் துல்லியமான எண்கள் தெரியவில்லை.

“இந்தப் போரை நிறுத்த இயலாது, ஆனால் காயமடைந்தவர்களின் மீட்பு நடவடிக்கைக்கு நம்மால் இயன்ற அனைத்தையும் செய்ய வேண்டும். இப்போரில் ஈடுபட்டிருக்கும் மக்களின் மனிதாபிமானத்தை வெளிப்படுத்திக்கொண்டும் இருக்க வேண்டும்,” என ஹாரி தெரிவித்தார்.

அவரது Invictus Games Foundation குழுவும் இப்பயணத்தில் இணைந்துள்ளது. 2014 இல் காயமடைந்த முன்னாள் இராணுவ வீரர்கள் விளையாட்டுகளில் பங்கேற்க அவர் தொடங்கிய இந்த விழாவில், 2022 இல் உக்ரைன் வீரர்களும் பங்கேற்க சிறப்பு அனுமதி வழங்கப்பட்டது.

இதனிடையே, ஹாரி மற்றும் மேகன் நடத்தும் “ஆர்ச்சுவெல்” தொண்டு நிறுவனம், உக்ரைனிலும் காசாவிலும் காயமடைந்த குழந்தைகளை ஆதரிக்க 5 இலட்சம் அமெரிக்க டாலர் (சுமார் ரூ. 3.6 கோடி) நிதி வழங்கியுள்ளது. இந்த நிதி, உலக சுகாதார அமைப்பின் மருத்துவ இடமாற்ற சேவைகள் மற்றும் செயற்கைக் கை, கால் தயாரிப்பு பணிகளுக்குப் பயன்படுத்தப்படும்.

இத்துடன், பிரிட்டிஷ் அரச குடும்பத்தின் மற்ற உறுப்பினர்களும் உக்ரைனுக்கு ஆதரவு தெரிவித்துள்ளார். மன்னர் சார்லஸ், ஜனாதிபதி ஜெலன்ஸ்கியை மார்ச் மாதம் சந்தித்தபோது ரஷ்யாவின் “அவதியற்ற தாக்குதல்” குறித்து கண்டனம் தெரிவித்துள்ளார். அதேபோல், இளவரசர் வில்லியம் மார்ச் மாதத்தில் எஸ்டோனியாவில் உக்ரைனிய அகதிகளைச் சந்தித்து, அவர்களின் துணிச்சலை பாராட்டினார்.

ஹாரியின் இந்தப் பயணம், அவர் தந்தை மன்னர் சார்லஸை லண்டனில் சந்தித்த இரு நாட்கள் கழித்தே நடந்துள்ளது.