ரிஷப்பந்த் மீண்டும் டெஸ்ட் அணியில் – BCCI அறிவிப்பு

இந்திய கிரிக்கெட் கட்டுப்பாட்டு வாரியம் (BCCI) நவம்பர் 5ஆம் திகதி புதன்கிழமை தென் ஆப்பிரிக்கா டெஸ்ட் தொடருக்கான 15 பேர் கொண்ட இந்திய அணியை அறிவித்துள்ளது. இதில், காயம் காரணமாக ஓய்வு எடுத்திருந்த விக்கெட் கீப்பர்–பேட்ஸ்மேன் ரிஷப்பந்த் மீண்டும் அணியில் இடம் பெற்றுள்ளார்.

இங்கிலாந்து சுற்றுப்பயணத்தின் போது காயம் அடைந்திருந்த ரிஷப்பந்த், நீண்ட கால சிகிச்சை மற்றும் மறுவாழ்வு பயிற்சியை முடித்து அணியில் திரும்பியுள்ளார். அவர் சமீபத்தில் நடைபெற்ற இந்தியா A மற்றும் தென் ஆப்பிரிக்கா A அணிகளுக்கிடையிலான தொடரில் சிறப்பாக விளையாடி, அணி கேப்டனாக வெற்றிக்குக் கொண்டு சென்றார்.

மாஞ்செஸ்டர் டெஸ்ட் போட்டியின் போது கிறிஸ் வோக் வீசிய பந்தில் பாதத்தில் காயம் ஏற்பட்டதையடுத்து, பந்த் பிசிசிஐயின் பெங்களூரு சிறப்புப் பயிற்சி மையத்தில் சிகிச்சை பெற்றார். இப்போது அவர் முழுமையாக குணமடைந்து, ஷுப்மன் கில்லின் துணை கேப்டனாக (Vice-Captain) டெஸ்ட் அணியில் சேர்க்கப்பட்டுள்ளார்.

மேலும், த்ரூவ் ஜுரேல் இரண்டாவது விக்கெட் கீப்பராக இடம்பெற்றுள்ளார். அக்சர் படேல் நீண்ட இடைவெளிக்குப் பிறகு மீண்டும் டெஸ்ட் அணியில் இணைந்துள்ளார். அவர் ரவீந்திர ஜடேஜா மற்றும் வாஷிங்டன் சுந்தர் ஆகியோருடன் இணைந்து ஆல்-ரவுண்டர் பிரிவில் வலுப்படுத்துவார்.

மேலும், ஆகாஷ் தீப் மீண்டும் டெஸ்ட் அணியில் சேர்க்கப்பட்டுள்ளார். தென் ஆப்பிரிக்கா அணி சமீபத்தில் பாகிஸ்தானில் 1-1 என முடிந்த தொடரை முடித்து முழு வலிமையுடன் இத்தொடருக்கு வரவுள்ளது.

இந்தத் தொடரின் முதல் டெஸ்ட் போட்டி நவம்பர் 14 முதல் 18 வரை கொல்கத்தாவின் ஈடன் கார்டனில் நடைபெறும். இரண்டாவது டெஸ்ட் நவம்பர் 22 முதல் 26 வரை கவுகாத்தியில் நடைபெறும்.

டெஸ்ட் தொடருக்குப் பிறகு மூன்று ஒருநாள் போட்டிகளும், ஐந்து டி20 போட்டிகளும் நடைபெறவுள்ளன.


தென் ஆப்பிரிக்கா தொடருக்கான இந்திய டெஸ்ட் அணி:


ஷுப்மன் கில் (கேப்டன்), ரிஷப்பந்த் (விக்கெட் கீப்பர், துணை கேப்டன்), யஷஸ்வி ஜெய்சுவால், கே.எல்.ராகுல், சாய் சுதர்சன், தேவ்தத் படிக்கல், த்ரூவ் ஜுரேல்,ரவீந்திர ஜடேஜா, வாஷிங்டன் சுந்தர், ஜஸ்ப்ரீத் பும்ரா, அக்சர் படேல், நிதிஷ் குமார் ரெட்டி, முகம்மது சிராஜ், குல்தீப் யாதவ், ஆகாஷ் தீப்.