ரோபோ சங்கரின் மனைவி நடனத்துக்கு மகள் விளக்கம்

சிறந்த நகைச்சுவை நடிகரும், தொலைக்காட்சி கலைஞருமான ரோபோ சங்கர் கடந்த மாதம் மரணமடைந்தது திரையுலகத்தையே துயரத்தில் ஆழ்த்தியது.

அவரது இறுதி சடங்கில் மனைவி நடனம் ஆடிய வீடியோ சமூக வலைதளங்களில் பரவிய நிலையில், பலரும் அதனை விமர்சித்தனர். இதற்கு தற்போது அவரது மகள் இந்திரஜா விளக்கம் அளித்துள்ளார்.

சென்னையில் செய்தியாளர்களிடம் பேசிய அவர், “அப்பா இல்லாமல் பேசுவது மிகவும் கடினம். அவர் எப்போதும் சிரிப்பும் மகிழ்ச்சியும்தான் விரும்பியவர். இறுதி சடங்குகளிலும் அந்த உணர்வை தாங்கிக்கொண்டே இருந்தோம்,” என்று கூறினார்.

மேலும், “அப்பா, அம்மா இருவருக்கும் நடனமே காதல் மொழி. அவர்கள் வாழ்க்கை முழுவதும் நடனத்திலேயே தங்கள் பாசத்தை வெளிப்படுத்தினர்.

அதனால் தான் அம்மா, அப்பாவை வழியனுப்பும்போது நடனமாடினார். அது அவருடைய காதலை வெளிப்படுத்தும் விதம் தான், வேறில்லை,” என்றார்.

அத்துடன், ரோபோ சங்கர் உடலில் வண்ணம் பூசியதால் மரணம் ஏற்பட்டது என்ற வதந்தி தவறானது என்றும், அதனை பின்னர் விரிவாக விளக்குவேன் எனவும் இந்திரஜா தெரிவித்தார்.

மேலும், சமூக வலைதளங்களில் பரவி வரும் தவறான தகவல்கள் அவர்களின் குடும்பத்துக்கு அதிர்ச்சியாக இருந்ததாகவும், உண்மை காலப்போக்கில் வெளிப்படும் எனவும் கூறினார்.

ரோபோ சங்கர் ஒரு மேடை கலைஞராக தொடங்கி, 1 லட்சத்திற்கும் மேற்பட்ட மேடைகளில் கலைநிகழ்ச்சி ஆற்றி சாதித்தவர் என்பதும், அவரது மரணம் தமிழ் சினிமாவுக்கு பெரும் இழப்பு என்பதும் குறிப்பிடத்தக்கது.