Samsung trifold மொபைல் – அசத்தும் புதிய கண்டுபிடிப்பு!

தென் கொரியாவின் சாம்சங் எலக்ட்ரானிக்ஸ் நிறுவனம் தனது அடுத்த தலைமுறை ட்ரைஃபோல்ட் ஸ்மார்ட்போனை (Trifold Smartphone) இந்த மாதம் நடைபெற உள்ள ஆசிய-பசிபிக் பொருளாதார ஒத்துழைப்பு (APEC) உச்சி மாநாட்டில் அறிமுகப்படுத்த உள்ளது.

இது சாம்சங் நிறுவனத்தின் முதல் இரண்டு மடிப்புகளைக் (two hinges) கொண்ட ஸ்மார்ட்போன் ஆகும். இந்த மொபைல் சாதாரண ஸ்மார்ட்போனாகவும், முழுமையாக திறந்தபின் பெரிய டேப்லெட்டாகவும் பயன்படுத்தக்கூடியதாக வடிவமைக்கப்பட்டுள்ளது. மாநாட்டின் போது நடைபெறும் தென் கொரிய தொழில்நுட்ப கண்காட்சியில் இது காட்சிப்படுத்தப்படவுள்ளது என தகவல்கள் தெரிவிக்கின்றன.

இந்த நிகழ்வு சாம்சங் நிறுவனத்துக்கு உலகளாவிய அளவில் பெரும் கவனத்தைப் பெற்றுத் தரும் என எதிர்பார்க்கப்படுகிறது. மடிக்கக்கூடிய மொபைல் போன்களை அறிமுகப்படுத்தியதில் சாம்சங் மற்றும் சீனாவின் ஹுவாய் டெக்னாலஜீஸ் (Huawei) ஆகியவை முன்னணியில் உள்ளன. ஹுவாய் கடந்த ஆண்டு சீனாவில் உலகின் முதல் ட்ரைஃபோல்ட் மொபைலை அறிமுகப்படுத்தியது. இப்போது சாம்சங் அதன் சர்வதேச வெளியீட்டை மேற்கொள்ளும் வாய்ப்பு பெற்றுள்ளது.

இம்மாத இறுதியில் நடைபெறும் APEC மாநாட்டில் பங்கேற்பாளர்கள் இந்த புதிய ட்ரைஃபோல்ட் சாதனத்தை நேரடியாக தொட அனுமதி கிடையாது. இது கண்ணாடிக்குள் காட்சிப்படுத்தப்படும் என எதிர்பார்க்கப்படுகிறது. முழுமையான வணிக வெளியீடு இந்த ஆண்டின் இறுதியில் நடைபெறும் என்று கூறப்படுகிறது.

மடிக்கக்கூடிய ஸ்மார்ட்போன் சந்தை 2019-ஆம் ஆண்டில் சாம்சங் நிறுவனத்தால் ஆரம்பிக்கப்பட்டது. தற்போது சீன நிறுவனங்கள் கடுமையான போட்டியில் ஈடுபட்டு, இந்த துறையில் முன்னேறி வருகின்றன. சாம்சங் தனது ஏழாம் தலைமுறை கேலக்ஸி Z Fold 7 மாடலை ஜூலை மாதத்தில் வெளியிட்டு வெற்றிகரமாக விற்பனை செய்து வருகிறது. இது அதன் மெல்லிய வடிவமைப்பு மற்றும் இலகுவான எடையால் பயனர்களிடையே பிரபலமானது.

இதற்கிடையில், ஆப்பிள் நிறுவனம் அடுத்த ஆண்டு தனது முதல் மடிக்கக்கூடிய ஐபோனை (folding iPhone) அறிமுகப்படுத்தத் தயாராகி வருவதால், உலக ஸ்மார்ட்போன் சந்தையில் கடுமையான போட்டி நிலவும் என நிபுணர்கள் தெரிவிக்கின்றனர்.