பாடசாலை நேரத்தில் மாற்றம் - கல்வி அமைச்சு உறுதி

அடுத்த ஆண்டு ஜனவரி மாதம் முதல் நாட்டின் அனைத்து பாடசாலைகளிலும் புதிய பாடசாலை நேரம் நடைமுறைக்கு வரும் என கல்வி அமைச்சு அறிவித்துள்ளது. இதன்படி, தற்போது பிற்பகல் 1.30 மணி வரை நடைபெறும் வகுப்புகள் இனி பிற்பகல் 2.00 மணி வரை நீடிக்கப்படும்.

கல்வி அமைச்சின் சமீபத்திய அறிவிப்பின்படி, இந்த மாற்றம் தேசிய கல்வி நிறுவகம் தயாரித்த கல்விச் சீர்திருத்த திட்டத்தின் ஒரு பகுதியாக அமைகிறது. இந்த மாற்றத்தின் நோக்கம், மாணவர்களின் கல்வி நேரத்தை சீர்மயமாக்கி, பாடத் தொகுப்புகளை முழுமையாக கற்பிக்க போதுமான நேரத்தை வழங்குவதாகும்.

கல்வி அமைச்சின் செயலாளர் நாலக்க கலுவேவ தெரிவித்ததாவது, “இந்த சீர்திருத்தம் நிபுணர்கள் தயாரித்த கல்வி திட்டத்தின் அடிப்படையில் மேற்கொள்ளப்படுகிறது. ஒவ்வொரு பாட நேரமும் முன்பை விட சிறிது நீளமாக இருப்பதால், மொத்த வகுப்பு நேரம் பிற்பகல் 2 மணி வரை நீட்டிக்கப்பட வேண்டியுள்ளது,” என்றார்.

ஆசிரியர் மற்றும் அதிபர் சங்கங்கள் இதற்கு எதிர்ப்பு தெரிவித்திருந்தாலும், கல்வி அமைச்சு தனது முடிவில் உறுதியுடன் உள்ளது. செயலாளர் மேலும் கூறியதாவது, “தொழிற்சங்கங்கள் தங்கள் கருத்துக்களை தெரிவிக்கலாம். ஆனால், தேசிய கல்வி நிறுவகத்தின் பரிந்துரைகள் ஏற்கனவே நடைமுறைப்படுத்தப்பட வேண்டும் என தீர்மானிக்கப்பட்டுள்ளன. அதனை மாற்றுவது சாத்தியமில்லை,” எனவும் தெரிவித்தார்.

அவர் மேலும் கூறியதாவது, இந்த சீர்திருத்தம் கல்வி தரத்தை மேம்படுத்தும் நோக்கத்துடன் மேற்கொள்ளப்படுவதால், மாணவர்கள், ஆசிரியர்கள், பெற்றோர்கள் அனைவரும் ஒத்துழைப்பு வழங்க வேண்டும் என்றும், 2026 ஜனவரி மாதம் முதல் அனைத்து பாடசாலைகளிலும் காலை 7.30 முதல் பிற்பகல் 2.00 மணி வரை புதிய நேர அட்டவணை நடைமுறைக்கு வரும் என உறுதிப்படுத்தினார்.