பாகிஸ்தான் அணியின் பலவீனம் கேப்டனே – சோயப் அக்தர்

ஆசியக் கோப்பை கிரிக்கெட் தொடரின் சூப்பர் 4 சுற்றில் இந்தியாவிடம் பாகிஸ்தான் அணி இரண்டு முறை தோல்வியடைந்தது. இந்த தோல்வி குறித்து முன்னாள் வேகப்பந்து வீச்சாளர் மற்றும் பிரபல வர்ணனையாளரான சோயப் அக்தர் கடுமையாக விமர்சித்துள்ளார்.

ஐக்கிய அரபு அமீரகத்தில் நடைபெற்று வரும் ஆசியக் கோப்பை தொடரில் இந்தியா, பாகிஸ்தான், வங்கதேசம் மற்றும் இலங்கை ஆகிய நான்கு அணிகள் சூப்பர் 4 சுற்றுக்கு தகுதி பெற்றுள்ளன. இதன் தொடக்கப் போட்டியில் இலங்கை வங்கதேசத்திடம் தோல்வியடைந்தது, அடுத்ததாக பாகிஸ்தான் இந்தியாவிடம் தோல்வியடைந்தது. இதையடுத்து இன்று இலங்கை–பாகிஸ்தான் அணிகள் மோதுகின்றன.

இந்தியாவிடம் தோல்வியடைந்ததைத் தொடர்ந்து தனது கருத்துகளை பகிர்ந்த சோயப் அக்தர், “பாகிஸ்தான் அணி தேர்வு முறையே தவறாக உள்ளது. இந்தியாவுக்கு எதிரான போட்டியில் குறைந்தபட்சம் 200 ரன்கள் எடுக்க வேண்டியது அவசியம். முதல் பத்து ஓவர்களில் 91 ரன்கள் எடுத்தும் அதை முன்னேற்ற முடியவில்லை.

இந்த அணியின் மிகப்பெரிய பலவீனம் கேப்டன்தான். அவர் மற்றும் பயிற்சியாளர் சேர்ந்து எடுத்த அணித் தேர்வுகள் தோல்விக்குக் காரணமாகியுள்ளன. சல்மான் அகா எதற்காக கேப்டனாக உள்ளார் என எனக்கே புரியவில்லை. அவர் தன் பொறுப்புகளை அறியாமல், மிடில் ஆர்டரில் களமிறங்குவதன் மூலம் அணிக்கு பலவீனம் மட்டுமே ஏற்படுத்தியுள்ளார். எனவே இந்த தோல்விக்கு கேப்டன் மற்றும் பயிற்சியாளர் தான் முழுப் பொறுப்பு ஏற்க வேண்டும்” என்று சோயப் அக்தர் சாடியுள்ளார்.