இணைய கடன்கள் குறித்து பொலிஸ் முக்கிய எச்சரிக்கை

இணையம் மற்றும் மொபைல் வழியாக கடன்கள் பெறும் போது மிகுந்த கவனம் தேவை என இலங்கை பொலிஸ் தலைமையகம் பொதுமக்களுக்கு எச்சரிக்கை விடுத்துள்ளது. சமீபத்தில் மோசடி கடன் சேவைகள் தொடர்பாக பெருமளவு புகார்கள் வந்துள்ளதைத் தொடர்ந்து இந்த எச்சரிக்கை வெளியிடப்பட்டுள்ளது.

பொலிஸார் தெரிவித்ததாவது, தற்போது பல நிறுவனங்கள் இணையம் மற்றும் மொபைல் பயன்பாடுகள் வழியாக வேகமான கடன்களை விளம்பரப்படுத்தி வருகின்றன. சில சந்தர்ப்பங்களில், எந்தவித அடமானமும் இன்றி உடனடி கடன் வழங்கப்படும் என கூறி, அழைப்புகள் அல்லது குறுந்தகவல்கள் வழியாக பொதுமக்களை ஏமாற்றும் முயற்சிகளும் இடம்பெறுகின்றன.

இந்நிலையில், கடன் பெறும் போது வட்டி விகிதங்கள் மற்றும் திருப்பிச் செலுத்தும் நிபந்தனைகள் குறித்து கவனம் செலுத்தாததால், பலர் கடுமையான நிதிசார் சிக்கல்களை எதிர்கொள்வதாக பொலிஸார் தெரிவித்துள்ளனர். தினசரி வரும் புகார்களின் அடிப்படையில், பலரும் எதிர்பாராத விதமாக மிக உயர்ந்த வட்டிகள் விதிக்கப்படுவதாக தெரியவந்துள்ளது.

மேலும், சில நிறுவனங்கள் கடன் திருப்பி செலுத்த முடியாதவர்களை தொலைபேசி வழியாக தொடர்ந்து தொந்தரவு செய்வதோடு, அவர்களின் பெயரை சமூக வலைதளங்களில் அவதூறு செய்யும் நடவடிக்கைகளிலும் ஈடுபடுகின்றன என்றும் தகவல்கள் வெளியாகியுள்ளன.

இந்த குற்றச்சாட்டுகள் குறித்து இலங்கை பொலிஸ், மத்திய வங்கியின் ‘Non-Banking Financial Institutions Supervision Department’ உடன் இணைந்து விசாரணை நடத்தியுள்ளது. அதில், இணையம் மற்றும் மொபைல் வழியாக கடன்கள் வழங்கும் பல நிறுவனங்கள் மத்திய வங்கியின் கட்டுப்பாட்டில் இல்லை என்பது உறுதிப்படுத்தப்பட்டுள்ளது.

இதையடுத்து, இத்தகைய நிறுவனங்களை சட்டரீதியான கண்காணிப்புக்குள் கொண்டு வர தேவையான நடவடிக்கைகள் எடுக்கப்படுவதாக மத்திய வங்கி தெரிவித்துள்ளது.

இதனிடையில், இலங்கை பொலிஸ் பொதுமக்கள் தங்கள் நிதிசார் தேவைகளுக்கு மத்திய வங்கியால் அங்கீகரிக்கப்பட்ட நிறுவனங்களிடம்தான் கடன் பெறுமாறு வலியுறுத்தியுள்ளது. இதன்மூலம் நிதி ஏமாற்றங்கள் மற்றும் சட்டவிரோத செயல்களில் சிக்குவதைத் தவிர்க்கலாம் எனவும் அறிவுறுத்தியுள்ளது.

மேலும், சந்தேகத்திற்கிடமான எந்த நிதி நடவடிக்கைகளையும் உடனடியாக அருகிலுள்ள பொலிஸ் நிலையத்தையோ அல்லது இலங்கை மத்திய வங்கியின் உத்தியோகபூர்வ இணையதளத்தையோ தொடர்புகொண்டு தெரிவிக்குமாறும் பொலிஸ் பொதுமக்களை கேட்டுக் கொண்டுள்ளது.