குடியேறிகளுக்கு கடும் நிபந்தனை - பிரிட்டனில் அறிவிப்பு

பிரிட்டனில் குடியேறி தங்க விரும்பும் வெளிநாட்டவர்களுக்கு எதிராக கடும் விதிமுறைகளை அறிமுகப்படுத்த உள்ளதாக உள்துறை அமைச்சர் ஷபானா மஹ்மூத் திங்கட்கிழமை (செப்டம்பர் 29) அறிவித்துள்ளார். இது, லிவர்பூலில் நடைபெறும் லேபர் கட்சியின் வருடாந்திர மாநாட்டில், வலதுசாரி ரீஃபார்ம் யுகே கட்சிக்கு எதிரான அரசின் முக்கிய நடவடிக்கையாக பார்க்கப்படுகிறது.

புதிய திட்டங்களின் படி, நிரந்தரமாக தங்க விரும்பும் குடியேறிகள் வேலை செய்து கொண்டிருக்க வேண்டும், அரசின் நலத்திட்ட உதவிகளை பெறக்கூடாது, சமூகப்பணிகளில் ஈடுபட வேண்டும் என்று நிபந்தனைகள் விதிக்கப்படுகின்றன. இதுவரை, குடும்பம் பிரிட்டனில் இருந்தாலோ அல்லது 5 முதல் 10 ஆண்டுகள் சட்டப்படி தங்கியிருந்தாலோ, "indefinite leave to remain" எனப்படும் நிரந்தர குடியிருப்பு அனுமதி கிடைத்தது.

ஆனால் இப்போது, சமூக பாதுகாப்புக் கட்டணங்களை செலுத்துதல், குற்றச்செயல் பதிவுகள் இல்லாமல் இருப்பது, சமூக சேவைகளில் பங்கேற்பது போன்ற கூடுதல் விதிமுறைகள் சேர்க்கப்பட உள்ளன. மேலும், ஆங்கில மொழியில் உயர் நிலை அறிவு கட்டாயமாக்கப்படலாம் என்றும் அமைச்சர் குறிப்பிட்டுள்ளார்.

இந்நிலையில், நைஜல் ஃபராஜ் தலைமையிலான ரீஃபார்ம் கட்சி, நிரந்தர குடியிருப்பு அனுமதியை முற்றிலுமாக ரத்து செய்து, ஒவ்வொரு 5 ஆண்டுகளுக்கும் புதிய வீசாவுக்கு விண்ணப்பிக்க வேண்டும் என்று அறிவித்துள்ளது. இதை "ஜாதி அடிப்படையிலான அநீதி" எனவும், "ஒழுக்கமற்றது" எனவும் பிரதமர் கியர் ஸ்டார்மர் கண்டித்துள்ளார்.

மேலும், பிரிட்டன்-பிரான்ஸ் எல்லைகளில் சிறிய படகுகளில் அபாயகரமான முறையில் குடியேறிகள் வந்து கொண்டிருப்பது கட்டுப்படுத்த முடியாத நிலை ஏற்பட்டுள்ளது. இந்த வருடம் மட்டும் 32,000 பேர் ஆங்கிலக் கால்வாய் வழியாக பிரிட்டனை அடைந்துள்ளனர். இதனால் உயிரிழப்புகளும் அதிகரித்து வருவதாக அரசு தெரிவித்துள்ளது.

கடந்த சனிக்கிழமையன்று மட்டும் 895 பேர் 12 சிறிய படகுகளில் பிரிட்டன் கரையைக் கண்டடைந்தனர். இந்த ஆண்டு தொடக்கம் முதல் குறைந்தது 27 பேர் உயிரிழந்துள்ளனர்.

அதேநேரத்தில், 100க்கும் மேற்பட்ட சமூக அமைப்புகள், குடியேறிகளை குற்றவாளிகளாக காட்டுவதை நிறுத்துமாறு உள்துறை அமைச்சருக்கு கடிதம் எழுதியுள்ளன.

பிரிட்டனின் உள்துறை அமைச்சகத்துடன் சேர்த்து நிதியமைச்சர் ரேச்சல் ரீவ்ஸ், வெளிவிவகார அமைச்சர் யுவெட் கூப்பர் ஆகியோரும் மாநாட்டில் உரையாற்றி, இளைஞர்களுக்கு வேலை வாய்ப்புகள், நாட்டின் மறுசீரமைப்பு, வலதுசாரி கொள்கைகளுக்கு எதிரான பிரிட்டனின் பாதை குறித்து தங்கள் கருத்துகளை வெளியிட்டனர்.