கோரத் தாண்டவம் ஆடிய மெல்லிசா புயல் - ஐ.நா. ஆழ்ந்த கவலை

கரீபியன் பகுதிகளில் கடுமையான அழிவை ஏற்படுத்திய மெல்லிசா புயலை குறித்து ஐக்கிய நாடுகள் அவையின் பொதுச் செயலாளர் அன்டோனியோ குட்டெரெஸ் ஆழ்ந்த கவலை தெரிவித்துள்ளார்.

இந்த புயல் அட்லாண்டிக் பெருங்கடலில் பதிவாகியுள்ள மிக சக்திவாய்ந்த புயல்களில் ஒன்றாகும் என்றும், பாதிக்கப்பட்ட நாடுகளுக்கு முழுமையான ஆதரவை வழங்குவதாகவும் அவர் உறுதியளித்துள்ளார்.

ஐ.நா. பேச்சாளர் ஸ்டெஃபன் துஜாரிக் வெளியிட்ட அறிக்கையில், “மெல்லிசா புயல் கரீபியன் நாடுகளில் பரவலான அழிவை ஏற்படுத்தி வருகிறது. இந்த புயல் செவ்வாய்க்கிழமை ஜமைக்காவில் கரையை கடந்து, கடுமையான மழை மற்றும் புயல் காற்றுடன் தாக்கியுள்ளது. பின்னர் அது கியூபா மற்றும் பஹாமாஸ் நோக்கி நகர்கிறது. இதே நேரத்தில், டொமினிக்கன் குடியரசு மற்றும் ஹைத்தியிலும் வெள்ளப் பேரழிவு ஏற்பட்டுள்ளது,” என்று கூறியுள்ளார்.

மேலும், “புயலில் உயிரிழந்தவர்களின் குடும்பங்களுக்கு ஆழ்ந்த அனுதாபங்களையும், காயமடைந்தோருக்கு விரைவில் நலம் பெற வாழ்த்துகளையும் பொதுச் செயலாளர் தெரிவித்துக்கொள்கிறார்.

பாதிக்கப்பட்ட நாடுகளின் அரசுகள் மற்றும் மக்களுடன் அவர் ஒற்றுமையுடன் நிற்கிறார்,” என்றும் குறிப்பிடப்பட்டுள்ளது.

ஐ.நா. தற்போது பாதிக்கப்பட்ட பகுதிகளில் தேவைகளை மதிப்பாய்வு செய்து, மனிதாபிமான அமைப்புகளுடன் இணைந்து உதவி நடவடிக்கைகளை மேற்கொண்டு வருவதாகவும், புயல் இன்னும் தாக்கக்கூடிய பகுதிகளுக்கு முன்னெச்சரிக்கை நடவடிக்கைகள் எடுக்கப்படுவதாகவும் அறிக்கை தெரிவித்துள்ளது.

மேலும், ஹைத்தி மற்றும் கியூபா நாடுகளுக்கான அவசர நிவாரண நிதியிலிருந்து தலா 4 மில்லியன் அமெரிக்க டாலர்கள் ஒதுக்கப்பட்டுள்ளதாகவும், இதன் மூலம் புயலின் தாக்கத்தை குறைக்கும் நடவடிக்கைகள் மேற்கொள்ளப்படுவதாகவும் அறிவிக்கப்பட்டுள்ளது.