பிக் பாஸ் தமிழ் மீது தடை கோரிக்கை - கடும் விமர்சனம்

விஜய் தொலைக்காட்சியில் ஒளிபரப்பாகி வரும் பிக் பாஸ் தமிழ் சீசன் 9 தற்போது பல்வேறு சர்ச்சைகளுக்கு இடமளித்துள்ளது. நடிகர் விஜய் சேதுபதி தொகுத்து வழங்கும் இந்நிகழ்ச்சி, ஆரம்பித்த சில நாட்களிலேயே பார்வையாளர்களிடையே பெரும் விவாதங்களை எழுப்பியுள்ளது.

இந்த சீசனில் பெரும்பாலான போட்டியாளர்கள் சமூக வலைத்தளங்களில் பிரபலமான இன்ஃபுளுவன்சர்கள் என்பதும் சிறப்பு.

தொடங்கிய முதல் வாரத்திலேயே பிக் பாஸ் வீடு முழுவதும் வாக்குவாதங்களும் உணர்ச்சிசார் மோதல்களும் ஏற்பட்டுள்ளன. திவாகர், ஆதிரை, வி.ஜே. பார்வதி, விக்னேஷ் உள்ளிட்ட போட்டியாளர்களிடையே நடந்த சில சம்பவங்கள் சமூக ஊடகங்களில் கடும் விமர்சனத்துக்குள்ளாகியுள்ளன.

இதே நேரத்தில், சில போட்டியாளர்கள் திடீரென வீட்டை விட்டு வெளியேறியதும், நிகழ்ச்சியின் திசை குறித்து கேள்விகள் எழுந்துள்ளன.

இந்த சூழ்நிலையில், தமிழக வாழ்வுரிமை கட்சித் தலைவர் வேல்முருகன் இன்று செய்தியாளர்களை சந்தித்து பிக் பாஸ் நிகழ்ச்சிக்கு தடை விதிக்க தமிழக அரசு நடவடிக்கை எடுக்க வேண்டும் என்று கோரிக்கை விடுத்துள்ளார். அவர் கூறியதாவது:

“விஜய் தொலைக்காட்சியில் ஒளிபரப்பாகும் பிக் பாஸ் நிகழ்ச்சி இளைய தலைமுறையின் சிந்தனையையும் நாகரிகத்தையும் பாதிக்கிறது. சமூக மதிப்புகளை குலைக்கும் வகையில் இந்த நிகழ்ச்சி தொடர்ந்து நடந்து வருகிறது. இத்தகைய நிகழ்ச்சிகள் சமூகத்தின் நெறிமுறையை சீரழிக்கின்றன.

இதற்கு உடனடியாக தடை விதிக்காவிட்டால், தமிழக வாழ்வுரிமை கட்சி கடுமையான போராட்டங்களை நடத்தும்,” என அவர் எச்சரித்தார்.

மேலும் அவர், “கர்நாடகா போன்ற மாநிலங்களில் இதுபோன்ற நிகழ்ச்சிகளுக்கு கட்டுப்பாடுகள் விதிக்கப்பட்டுள்ளன. அதுபோல் தமிழ்நாட்டிலும் இத்தகைய நடவடிக்கை எடுக்கப்பட வேண்டும்,” என வலியுறுத்தினார்.

இதன் மூலம் பிக் பாஸ் தமிழ் சீசன் 9 மீதான சர்ச்சைகள் மேலும் தீவிரமடைந்துள்ளன. தற்போது சமூக ஊடகங்களில் இதற்கான ஆதரவு, எதிர்ப்பு கருத்துக்கள் பல வடிவங்களில் வெளிவருகின்றன.