திருச்சியில் இன்று விஜய் தேர்தல் பரப்புரை தொடக்கம்

தமிழ் திரைத்துறையில் முன்னணி நடிகராகத் திகழ்ந்த விஜய், தமிழகம் வெற்றிக் கழகம் (தவெக) என்ற அரசியல் கட்சியைத் தொடங்கி 2026 சட்டமன்றத் தேர்தலில் வெற்றி பெற்று ஆட்சியை அமைக்க இலக்குடன் செயல்பட்டு வருகிறார்.

இதுவரை கட்சித் தொண்டர்களை மாநாடுகள் வாயிலாகவே சந்தித்து வந்த அவர், இன்று (சனிக்கிழமை) திருச்சியில் இருந்து தனது தேர்தல் பரப்புரை மற்றும் மக்கள் சந்திப்பு பயணத்தை அதிகாரப்பூர்வமாக தொடங்குகிறார்.

இதன் முதல் கட்டமாக திருச்சி, அரியலூர், பெரம்பலூர் ஆகிய மாவட்டங்களில் விஜய் பரப்புரை மேற்கொள்ள உள்ளார்.

இதற்காக காவல்துறை பல்வேறு நிபந்தனைகளுடன் அனுமதி வழங்கியுள்ள நிலையில், அந்த நிபந்தனைகளை ராணுவக் கட்டுப்பாடுடன் கடைப்பிடிக்க வேண்டுமென தனது தொண்டர்களிடம் விஜய் வலியுறுத்தியுள்ளார்.

விஜயின் இந்த மக்கள் சந்திப்பு பயணத்துக்கு “வாகை சூடும் வரலாறு திரும்புகிறது; உங்க விஜய் நான் வரேன்” என பெயரிடப்பட்டுள்ளது. மாநிலம் முழுவதும் மக்கள் சந்திப்பு நிகழ்ச்சிகள் நடைபெறும் என்றும், மனசாட்சி நிறைந்த மக்களாட்சியை உருவாக்குவதே தவெக கட்சியின் நோக்கமாகும் என்றும் விஜய் குறிப்பிட்டுள்ளார்.

ஆனால், தவெக மீதான காவல்துறை விதிமுறைகள் அதிகப்படுத்தப்பட்டுள்ளதாக விஜய் குற்றம்சாட்டியுள்ளார். அனைத்து அரசியல் நிலைப்பாடுகளையும் தாண்டி, தவெக தொண்டர்களுக்கும், பொதுமக்களுக்கும் காவல்துறை பாதுகாப்பு வழங்கப்பட வேண்டும் எனவும் அவர் வலியுறுத்தியுள்ளார்.

மக்கள் சந்திப்பு நிகழ்ச்சிகள் நடைபெறும் போது ஆம்புலன்ஸ்களுக்கு வழிவிட வேண்டும், மரங்கள், மின்கம்பங்கள் போன்றவற்றின் அருகில் செல்லக் கூடாது என கட்சி தலைமையகம் தொண்டர்களுக்கு அறிவுறுத்தியுள்ளது.

தவெக பொதுச்செயலாளர் ஆனந்த் வெளியிட்ட அறிக்கையில், கர்ப்பிணிகள், முதியவர்கள், குழந்தைகளுடன் வரும் பெண்கள், பள்ளி மாணவர்கள் போன்றோர் நேரில் பங்கேற்பதைத் தவிர்க்க வேண்டும் என கேட்டுக்கொள்ளப்பட்டுள்ளது.

மேலும் பட்டாசு வெடிப்பது, அனுமதி இன்றி பேனர்கள், கொடிகள், அலங்கார வளைவுகள் அமைப்பது போன்றவற்றை தவிர்க்கும்படி தொண்டர்களுக்கு அறிவுரை வழங்கப்பட்டுள்ளது.

இதனிடையே, சென்னை பனையூரில் இருந்து புறப்பட்ட விஜயின் பரப்புரை வாகனம் தவெக கொடி வண்ணத்தில் அலங்கரிக்கப்பட்டு திருச்சியை நோக்கி பயணிக்கிறது. பல்வேறு பகுதிகளில் தொண்டர்கள் மலர் தூவி, ஆரத்தி எடுத்தும், உற்சாக வரவேற்பளித்தும் பரப்புரை வாகனத்தை வரவேற்றனர். விக்கிரவாண்டியில் பட்டாசு வெடித்து கொண்டாடியதும் குறிப்பிடத்தக்கது.

விஜயின் அரசியல் பயணம், மக்களுடன் நேரடி தொடர்பை உருவாக்கும் முக்கிய கட்டத்தை எட்டியுள்ள நிலையில், அவரது இந்த மக்கள் சந்திப்பு பயணம் தமிழக அரசியல் களத்தில் பெரும் கவனத்தை ஈர்த்துள்ளது.