கரூரில் பாதிக்கப்பட்ட குடும்பங்களை நேரில்சந்தித்த விஜய்

கரூரில் நடந்த பரப்புரைக் கூட்ட நெரிசல் பேரழிவில் உயிரிழந்தோரின் குடும்பங்களை இன்று (அக்டோபர் 27) நடிகரும் தமிழக வெற்றிக் கழகத் தலைவருமான விஜய் நேரில் சந்தித்து ஆறுதல் கூறினார். மாமல்லபுரத்தில் நடைபெற்ற இந்த சந்திப்பு, கடந்த மாதம் 27ஆம் திகதி நடந்த துயரமான நிகழ்விற்கு துல்லியமாக ஒரு மாதத்திற்குப் பிறகு நடைபெற்றது.

கரூர் வேலுச்சாமிபுரத்தில் நடந்த தவெக (தமிழக வெற்றிக் கழகம்) தலைவர் விஜயின் பொதுக்கூட்டத்தில் ஏற்பட்ட கூட்ட நெரிசலால் 41 பேர் உயிரிழந்தது நாடு முழுவதும் அதிர்ச்சியை ஏற்படுத்தியது. அப்போது காணொலி வழியாக குடும்பத்தினருக்கு ஆறுதல் தெரிவித்த விஜய், நேரில் சந்தித்து ஆறுதல் கூறுவதாக வாக்குறுதி அளித்திருந்தார்.

அந்த வாக்குறுதியை நிறைவேற்றும் விதமாக இன்று மாமல்லபுரத்தில் சிறப்பு சந்திப்பு ஏற்பாடு செய்யப்பட்டது. காலை முதலே தவெக நிர்வாகிகள், பாதிக்கப்பட்ட குடும்பத்தினரை கரூரிலிருந்து சென்னைக்கு அழைத்து வர ஏற்பாடுகள் செய்தனர். சுமார் 235 பேர் - 37 உயிரிழந்தோரின் குடும்பத்தினர் - ஐந்து சொகுசுப் பேருந்துகளில் மாமல்லபுரம் வந்தடைந்தனர்.

விஜய் ஒவ்வொரு குடும்பத்தாரையும் தனித்தனியாக சந்தித்து அவர்களின் கோரிக்கைகள், பிரச்சினைகள் மற்றும் தேவைகளை நேரடியாக கேட்டறிந்தார். இந்த சந்திப்பு காலை 9.30 மணிக்கு தொடங்கி மாலை 5.55 மணிக்கு முடிந்தது. விஜய், பாதிக்கப்பட்ட குடும்பங்களுக்கு கல்விச் செலவுகள், மருத்துவச் செலவுகள் மற்றும் வேலைவாய்ப்புக்கான உதவிகளை தனிப்பட்ட முறையில் ஏற்பாடு செய்து தருவதாக உறுதியளித்தார்.

விஜயின் இந்த மனிதநேய நடவடிக்கை, சமூக வலைதளங்களில் பரவலாக பாராட்டுக்களை பெற்றுள்ளது. பலரும், “துயரத்தில் இருக்கும் மக்களை நேரில் சந்தித்து ஆறுதல் கூறும் விஜய் - இதுவே உண்மையான தலைமைத் தன்மை” என கருத்து தெரிவித்துள்ளனர்.

கரூர் துயர சம்பவத்திற்குப் பின் மக்களின் உணர்வுகளை மதித்து அமைதியாக செயல்பட்ட விஜய், தனது நடவடிக்கைகளால் அரசியல் மற்றும் பொதுமக்கள் வட்டாரத்தில் பெரும் வரவேற்பைப் பெற்றுள்ளார். தவெக சார்பில், பாதிக்கப்பட்ட குடும்பங்களுக்கு தொடர்ந்து உதவி மற்றும் நிவாரண நடவடிக்கைகள் மேற்கொள்ளப்படும் எனவும் தெரிவிக்கப்பட்டுள்ளது.