வைரலாகும் விஷால் - சாய் நிச்சயதார்த்த புகைப்படம்

தமிழ் சினிமா உலகில் நீண்ட நாளாக ரசிகர்கள் எதிர்பார்த்த செய்தி இன்று நனவானது. நடிகர் விஷால் தனது பிறந்த நாளான ஆகஸ்ட் 29 அன்று சாய் தன்ஷிகாவுடன் திருமண நிச்சயதார்த்தத்தை எளிமையாக முடித்துள்ளார்.

சென்னை அண்ணா நகரில் உள்ள இல்லத்தில் நடைபெற்ற இந்நிகழ்ச்சியில் இருவரது குடும்பத்தினர், நெருங்கிய உறவினர்கள் மற்றும் சில நண்பர்கள் மட்டுமே கலந்து கொண்டனர்.

நிச்சயதார்த்த புகைப்படங்களை நேரடியாக தனது எக்ஸ் பக்கத்தில் பகிர்ந்த விஷால், “எனது பிறந்த நாளில் வாழ்த்து தெரிவித்த அனைவருக்கும் நன்றி. இன்று சாய் தன்ஷிகாவுடன் எனது நிச்சயதார்த்தம் மிக எளிமையாக நடைபெற்றது” என்று தெரிவித்துள்ளார்.

Thank u all u darlings from every nook and corner of this universe for wishing and blessing me on my special birthday. Happy to share the good news of my #engagement that happend today with @SaiDhanshika amidst our families.feeling positive and blessed. Seeking your blessings and… pic.twitter.com/N417OT11Um

— Vishal (@VishalKOfficial) August 29, 2025

சாய் தன்ஷிகா மற்றும் விஷால் மோதிரம் மாற்றிக் கொள்ளும் புகைப்படங்கள் இணையத்தில் வைரலாக பரவி வருகின்றன. ரசிகர்கள் மற்றும் திரையுலக நண்பர்கள் இருவருக்கும் வாழ்த்துகளை மழையென பதிவிட்டு வருகின்றனர்.

முன்னதாக சாய் தன்ஷிகாவை காதலிப்பதாக செய்தியாளர் சந்திப்பில் உறுதிப்படுத்தியிருந்த விஷால், “நடிகர் சங்க கட்டிடம் முடிந்த பின் தான் திருமணம் செய்வேன்” என்று கூறியிருந்தார்.

அந்த பணிகள் இன்னும் முழுமையாக முடியாத நிலையில், தனது பிறந்த நாளில் திருமணம் நடைபெறாது, ஆனால் ஒரு நல்ல செய்தி சொல்வேன் என்று கூறியிருந்தார். அந்த வாக்குறுதியை நிச்சயதார்த்தம் மூலம் நிறைவேற்றியுள்ளார்.

48 வயதான விஷால் தற்போது ரவி அரசு இயக்கும் மகுடம் படத்தில் நடித்து வருகிறார். திருமண தேதி பற்றிய அறிவிப்பு விரைவில் வெளியாகும் என எதிர்பார்க்கப்படுகிறது.