ஜீன்ஸ் அணிந்தால் சிறை தண்டனை கொடுக்கும் நாடு..!

உலகம் முழுவதும் பலவிதமான கலாச்சாரங்கள், மரபுகள் மற்றும் விதிமுறைகள் நிலவுகின்றன.

சில நாடுகளில் சாதாரணமாகக் கருதப்படும் ஒன்று, வேறு சில நாடுகளில் கடுமையான குற்றமாகக் கருதப்படலாம். அவ்வாறான ஆச்சரியமான சட்டங்களுள் ஒன்று, வடகொரியாவில் ஜீன்ஸ் அணிவதற்கே விதிக்கப்பட்டுள்ள தடை ஆகும்.

உலகின் மிகவும் மர்மமான நாடுகளில் ஒன்றாகக் கருதப்படும் வடகொரியாவில், அந்நாட்டின் தலைவர் கிம் ஜாங் உன் மேற்கத்திய கலாச்சாரத்தின் தாக்கத்தைத் தடுப்பதற்காக பல விதமான கட்டுப்பாடுகளை விதித்துள்ளார்.

அதில் முக்கியமானது ஜீன்ஸ் அணிவதற்கான தடை. ஜீன்ஸ் என்பது அமெரிக்க செல்வாக்கின் சின்னமாகக் கருதப்படுவதால், அதை அணிவோர் வெளிநாட்டு சிந்தனைகளுக்கு அடிமையானவர்கள் என்றும், துரோகிகள் என்றும் கருதப்படுகிறார்கள்.

மேலும், ஜீன்ஸை மட்டுமல்லாமல் மேற்கத்திய ஆடைகள், குறிப்பிட்ட வகையான முடி வெட்டுதல், அந்நாட்டு அரசாங்கத்துக்கு விரோதமான ஊடகங்களைப் பயன்படுத்துதல் போன்றவை அனைத்தும் வடகொரியாவில் தடை செய்யப்பட்டுள்ளன. இதனை மீறுபவர்கள் கடுமையான தண்டனைக்கு உள்ளாகிறார்கள். சில சமயங்களில் சிறை தண்டனை விதிக்கப்படுவதும் வழக்கமாக உள்ளது.

இது போன்ற சட்டங்கள் உலகத்தரப்பில் ஆச்சரியத்தையும் அதிர்ச்சியையும் ஏற்படுத்துகின்றன. ஒரு சாதாரண ஆடைத் தேர்வுக்கே சிறை தண்டனை விதிக்கும் அளவுக்கு கட்டுப்பாடுகளை விதிக்கும் நாடு வடகொரியா என்பதை நினைக்கும் போதே பலர் ஆச்சரியத்தில் ஆழ்கிறார்கள்.