பெண்களின் சொத்துகளை சட்டப்படி பாதுகாப்பது எப்படி?

இன்றைய சமூகத்தில் பெண்களின் உரிமைகள் குறித்த விழிப்புணர்வு மிக முக்கியமானதாக உள்ளது. குறிப்பாக சொத்துரிமை என்பது பெண்கள் தங்கள் தனிப்பட்ட வாழ்க்கையிலும், குடும்பத்திலும் நிதிசார்ந்த பாதுகாப்பை உருவாக்கும் அடிப்படை உரிமையாகக் கருதப்படுகிறது. ஆனால் இன்னும் பலருக்கு இது குறித்த தெளிவான தகவல்கள் இல்லை என்பதே வருத்தம்.

சொத்துரிமை என்றால் என்ன?

ஒருவருக்கு சொத்துகளை வாங்க, வைத்திருக்க, அதை நடத்த, பிறருக்கு கொடுக்க, விற்க அல்லது பரம்பரை வழியாக பெற்றுக்கொள்ளும் சட்டபூர்வமான உரிமைதான் சொத்துரிமை. இந்த உரிமை ஆண்கள் மட்டுமல்ல, பெண்களுக்கும் சமமாக இருக்க வேண்டும் என்பது ஒவ்வொரு நவீன சட்டத்தின் அடிப்படை நோக்கம்.

இலங்கையில் பெண்களின் சொத்துரிமை

இலங்கையில் பெண்கள் தனித்து சொத்து வாங்க முடியும். திருமணமாக இருந்தாலும், திருமணத்திற்கு முன் இருந்த சொத்துகள், அவளது தனிப்பட்ட சொத்தாகவே தங்கும். திருமணத்தின் போது பெற்ற வரதட்சணை என்ற சொத்துகள் கூட, அத்தைய பெண்களின் சொத்தாகவே கருதப்பட வேண்டும். கணவன் அல்லது அவருடைய குடும்பத்தினர் அதை தங்களுக்கு உரியதாகக் கூற முடியாது.

மணமான பெண் ஒருவருக்கு, தந்தை, தாயார், சகோதரர்கள், கணவன், குழந்தைகள் ஆகியோரிடமிருந்து சொத்துக்கள் பரம்பரையாக வரலாம். இந்த உரிமைகளை மறுக்கும் நிகழ்வுகள், குறிப்பாக கிராமப்புறங்களில் இன்னும் இருந்து வருகின்றன. ஆனால் சட்டப்படி, பெண் ஒருவர் தனது குடும்ப சொத்தில் சம உரிமை பெற்றவளாகவே கருதப்பட வேண்டும்.

பெண்கள் விருப்பப்படி தங்களது சொத்தை பிறருக்கு கொடையளிக்கலாம். இந்த கொடைகள் எழுத்து மூலம் உறுதிப்படுத்தப்பட வேண்டும். அதற்காக சட்ட ஆலோசனையும், பதிவு செய்யும் முறையும் பின்பற்றப்பட வேண்டும்.

பெண்கள் தங்கள் சொத்துரிமை மீறப்பட்டிருப்பதாக நினைத்தால், சட்டத்தரணிகள், பெண்கள் மேம்பாட்டு மையங்கள், மனித உரிமை ஆணைக்குழுக்கள் ஆகியவற்றின் உதவியை நாடலாம். நீதிமன்றம் வழியாக சொத்துகளை மீட்டுக்கொள்ளலாம்.

விவாகரத்துக்கு பிறகு, கணவன்-மனைவி இருவரும் பெற்ற சொத்துகளில் யாருக்கு என்ன உரிமை என்பது தொடர்பாக நீதிமன்றம் தீர்மானிக்கிறது. திருமணத்தின் போது பெறப்பட்ட சொத்துக்களைப் பகிர்ந்துகொள்ளும் உரிமை இருந்தாலும், தனிப்பட்ட சொத்துக்கள் மாறாதவையாக இருந்தால், அது அவரவருக்கு சொந்தமானதாகவே இருக்கும்.

இன்றைய பெண்கள் கல்வி, வேலைவாய்ப்பு, தொழில் ஆகியவற்றில் முன்னேறிவிட்டனர். ஆனால் நிதி மற்றும் சொத்துரிமை குறித்த அறிவு இல்லாமல் இருப்பது அவர்களது பாதுகாப்பைத் தீர்மானிக்கும் முக்கிய அம்சங்களில் ஒன்றை புறக்கணிப்பதாகும்.

உங்கள் சொத்துகளைப் பாதுகாக்க, சட்ட அறிவை வளர்த்துக்கொள்வதும், தேவையான ஆவணங்களை முறையாக வைத்திருப்பதும் உங்கள் வாழ்வில் நிதானமான பாதுகாப்பை வழங்கும்.