விமானப் பயணத்தில் தடைவிதிக்கப்பட்ட உணவுகள்

விமானப் பயணத்தின் போது பாதுகாப்பு காரணங்களுக்காக பல விதிமுறைகள் அமல்படுத்தப்பட்டுள்ளன.

குறிப்பாக, பயணிகள் தங்களது கைப்பையில் எதை எடுத்துச் செல்லலாம், எதை எடுத்துச் செல்லக்கூடாது என்பதில் விமான நிலைய பாதுகாப்பு அதிகாரிகள் கடுமையாக கண்காணிக்கின்றனர்.

பலர் தெரியாமலோ, கவனக்குறைவாலோ சில உணவுப் பொருட்களை கைப்பையில் எடுத்து செல்வதனால் சோதனையில் பறிமுதல் செய்யப்படுகின்றன.

பயணிகளுக்கு சிரமம் ஏற்படாமல் இருக்க, கைப்பையில் எடுத்துச் செல்ல முடியாத முக்கியமான 7 உணவுப் பொருட்களை இங்கே பார்க்கலாம்.

முதலில் திரவமாக உள்ள உணவுகள், குறிப்பாக சூப், குழம்பு, பால் மற்றும் தயிர் போன்றவற்றை கைப்பையில் எடுத்துச் செல்ல முடியாது. சர்வதேச விமான போக்குவரத்து விதிமுறைகளின்படி, 100 மில்லி லிட்டர் க்கும் அதிகமான திரவப் பொருட்கள் அனுமதிக்கப்படுவதில்லை. இதேபோல, ஊறுகாய், சாஸ், தேன் மற்றும் ஜாம் போன்ற ஒட்டும் தன்மை கொண்ட உணவுகளும் கைப்பையில் தடை செய்யப்பட்டவை.

மேலும், கடல் உணவுகள் மற்றும் அதிக துர்நாற்றம் வீசும் உலர் மீன் போன்றவற்றை எடுத்துச் செல்ல முடியாது. விமானத்தில் உள்ள பிற பயணிகளுக்கு சிரமம் ஏற்படுத்தக் கூடிய உணவுகள் கண்டிப்பாக பறிமுதல் செய்யப்படும். முளைக்கீரை, பழங்கள், காய்கறிகள் போன்ற பசுமையான விவசாயப் பொருட்கள் பல நாடுகளில் நுழைவதற்கு அனுமதிக்கப்படுவதில்லை, ஏனெனில் அவை நோய் மற்றும் புழுக்கள் பரவ வாய்ப்பை அதிகரிக்கின்றன.

அதேபோல, எண்ணெய், வெண்ணெய், கிரீம், சாக்லேட் ஸ்பிரெட் போன்ற அரை திரவப் பொருட்களும் தடைப்பட்ட பட்டியலில் அடங்குகின்றன. பாதுகாப்பு சோதனையில் இவை பறிமுதல் செய்யப்பட்டால், மீண்டும் திரும்பிக் கொள்ள முடியாது என்பதால் பயணிகள் மிகுந்த கவனத்துடன் இருக்க வேண்டும்.

இதற்கிடையில், சமைக்கப்பட்ட மாமிசம் மற்றும் உறையவைக்கப்பட்ட (Frozen) உணவுகளையும் பல நாடுகள் தடைசெய்துள்ளன. பாதுகாப்பு காரணங்களைத் தவிர, ஆரோக்கிய அபாயங்களையும் கருத்தில் கொண்டு இவ்வாறான உணவுகள் அனுமதிக்கப்படுவதில்லை.

இவ்வாறு, கைப்பையில் எடுத்துச் செல்லக்கூடாத உணவுப் பொருட்கள் குறித்த விழிப்புணர்வு பயணிகளுக்கு அவசியமானது. விமான நிலையத்தில் சோதனையின் போது சிக்காமல் இருக்க, அனுமதிக்கப்பட்ட உணவுகளை மட்டும் எடுத்துச் செல்லுவது நல்லது.