
கோழி vs முட்டை… முதலில் உருவானது எது? அறிவியல் விளக்கம் இதோ!
“கோழி முதலில் வந்ததா? அல்லது முட்டை முதலில் வந்ததா?” என்ற கேள்வி பல ஆண்டுகளாக விவாதிக்கப்பட்டு வரும் புதிர்களில் ஒன்றாகும். இதற்கு தத்துவ ரீதியாக பல விளக்கங்கள் இருந்தாலும், தற்போது பரிணாம அறிவியல் மற்றும் உயிரியல் ஆய்வுகள் இதற்கு தெளிவான விளக்கத்தை அளிக்கின்றன.
முதலில், முட்டை என்பது கோழிகளால் மட்டுமே உருவாக்கப்பட்ட ஒன்று அல்ல என்பதை புரிந்துகொள்ள வேண்டும். கோழிகள் தோன்றுவதற்கு பல கோடி ஆண்டுகளுக்கு முன்பே பல வகையான உயிரினங்கள் முட்டையிட்டு இனப்பெருக்கம் செய்து வந்துள்ளன. சுமார் 340 மில்லியன் ஆண்டுகளுக்கு முன்பே நிலத்தில் வாழும் உயிரினங்கள் பாதுகாப்பான ஓடு கொண்ட முட்டைகளை உருவாக்கியதாக விஞ்ஞானிகள் கூறுகின்றனர்.

மறுபுறம், இன்று நாம் அறியும் கோழி (Chicken) என்பது பரிணாம வளர்ச்சியின் மூலம் உருவான ஒரு பறவை. சிவப்பு காட்டுக்கோழி போன்ற பறவைகளில் ஏற்பட்ட மரபணு மாற்றங்களின் விளைவாக ஆயிரக்கணக்கான ஆண்டுகளுக்கு முன்பு முதல் உண்மையான கோழி தோன்றியதாக ஆய்வாளர்கள் கருதுகின்றனர்.
அந்த முதல் கோழி, கோழியைப் போன்றிருந்த இரண்டு முன்னோடி பறவைகள் இட்ட ஒரு முட்டைக்குள் ஏற்பட்ட மரபணு மாற்றத்தின் காரணமாக உருவானது. அதாவது, முதல் உண்மையான கோழி ஒரு முட்டையிலிருந்தே பிறந்தது.
ஆனால், இங்கே ஒரு முக்கியமான விஷயம் உள்ளது. “கோழி முட்டை” என்று குறிப்பிட்டால், அதன் ஓடு உருவாக OC-17 என்ற சிறப்புப் புரதம் தேவைப்படுகிறது. இந்தப் புரதம் கோழிகளின் உடலில் மட்டுமே உருவாகிறது. எனவே, உண்மையான கோழி முட்டையை இட ஒரு கோழி இருக்க வேண்டியது அவசியம்.

இதனால், “முட்டை” என்றால் பொதுவாக எந்த உயிரினத்தின் முட்டையையும் குறிப்பதாக எடுத்துக்கொண்டால், முட்டைதான் முதலில் வந்தது என்று அறிவியல் கூறுகிறது. ஆனால் “கோழி முட்டை” என்று குறிப்பிட்டால், அதை இடுவதற்கு முதலில் கோழி இருக்க வேண்டும் என்பதே அறிவியல் விளக்கம்.
இவ்வாறு பார்க்கும்போது, பல ஆண்டுகளாக மனிதர்களை சிந்திக்க வைத்த இந்தக் கேள்விக்கு, பரிணாம அறிவியல் மிகவும் தர்க்கரீதியான மற்றும் சுவாரஸ்யமான பதிலை வழங்கியுள்ளது.



