
தலவத்துகொட உணவக தீ விபத்தில் உயிரிழந்தோர் எண்ணிக்கை 3 உயர்வு
தலவத்துகொட உணவகத்தில் நேற்று காலை ஏற்பட்ட தீ விபத்தில் காயமடைந்த மேலும் இருவர் சிகிச்சை பலனின்றி உயிரிழந்ததைத் தொடர்ந்து, உயிரிழந்தோரின் எண்ணிக்கை மூன்றாக உயர்ந்துள்ளது என பொலிஸார் தெரிவித்துள்ளனர்.
இந்த தீ விபத்தில் காயமடைந்த மூவர் கொழும்பு தேசிய வைத்தியசாலையில் அனுமதிக்கப்பட்டு சிகிச்சை பெற்று வந்த நிலையில், அவர்கள் மூவரும் பின்னர் உயிரிழந்துள்ளனர்.
நேற்று காலை உணவகத்தில் திடீரென தீ பரவியதை அடுத்து, ஸ்ரீ ஜயவர்தனபுர கோட்டை மாநகர சபைக்கு சொந்தமான மூன்று தீயணைப்பு வாகனங்கள் சம்பவ இடத்திற்கு அனுப்பப்பட்டு தீ கட்டுப்பாட்டுக்குள் கொண்டு வரப்பட்டது.

ஆரம்பகட்ட விசாரணைகளின்படி, எரிவாயு கசிவு காரணமாக இந்த தீ விபத்து ஏற்பட்டிருக்கலாம் என சந்தேகிக்கப்படுகின்றது. எனினும், தீ விபத்திற்கான சரியான காரணம் இதுவரை உறுதிப்படுத்தப்படவில்லை.
சம்பவம் தொடர்பில் தலங்கம பொலிஸார் மேலதிக விசாரணைகளை மேற்கொண்டு வருகின்றனர்.
இந்த துயர சம்பவம் தொடர்பில் உயிரிழந்தவர்களின் அடையாளங்கள் மற்றும் மேலதிக தகவல்கள் பின்னர் வெளியிடப்படும் என அதிகாரிகள் தெரிவித்துள்ளனர்.



